മുൻ ഇന്ത്യൻ ക്രിക്കറ്റ് ടീം ക്യാപ്റ്റനും ബി.സി.സി.ഐ പ്രസിഡന്റുമായിരുന്ന സൗരവ് ഗാംഗുലിയുടെ ജീവിതം സിനിമയാകുന്നു. ഗാംഗുലിയുടെ ജീവിതത്തിലെ പുറംലോകത്തിനറിയാത്ത അനുഭവങ്ങളാണ് തിരക്കഥയിൽ ഉൾക്കൊള്ളിച്ചിരിക്കുന്നത്. ഈ വർഷം അവസാനത്തോടെ സിനിമയുടെ ഷൂട്ടിംഗ് ആരംഭിക്കുമെന്നാണ് റിപ്പോർട്ട്.
നിർമാതാവ് അങ്കുർ ഗാർഗും സംവിധായകൻ ലവ് രഞ്ജൻ എന്നിവരാണ് ചിത്രമൊരുക്കുന്നത്. ഇതുമായി ബന്ധപ്പെട്ട് ഇരുവരും കഴിഞ്ഞ ദിവസം കൊൽക്കത്തയിലെത്തി ഗാംഗുലിയെ സന്ദർശിച്ചിരുന്നു. ദാദയുമായി വിശദമായ ചർച്ച നടന്നു. ഗാംഗുലിയുടെ ജീവിതത്തിലെ പല സംഭവങ്ങളും സംവിധായകൻ ശേഖരിച്ചിട്ടുണ്ട്. ആദ്യഘട്ട തിരക്കഥ ഇതിനോടകം പൂർത്തിയായിട്ടുണ്ട്. ബിസിസിഐ പ്രസിഡന്റായിരുന്ന ഒരു താരത്തിന്റെ ഓർമക്കുറിപ്പ് എന്നതിലുപരി ഒരു അനുഭവം വെള്ളിത്തിരയിലൂടെ നൽകാനാണ് ഗാർഗും രഞ്ജനും ശ്രമിക്കുന്നത്. കൂടാതെ, ഗാംഗുലിയുടെ ഭാര്യ ഡോണയിൽ നിന്നും ഗാംഗുലിയുമായി അടുത്ത് ബന്ധമുള്ളവരിൽ നിന്നും ഇരുവരും വിവരങ്ങൾ തേടുന്നുണ്ടെന്നും റിപ്പോർട്ട് സൂചിപ്പിക്കുന്നു.
അതേസമയം ബിഗ്‌സ്‌ക്രീനിൽ ആരാവും സൗരവ് ഗാംഗുലിയെ അവതരിപ്പിക്കുന്നതിനേക്കുറിച്ച് സ്ഥിരീകരണമായിട്ടില്ല. രൺബീർ കപൂറിന്റെ പേരാണ് കൂടുതലായി പ്രചരിക്കുന്നത്. മഹേന്ദ്ര സിംഗ് ധോനിയുടെ ജിവിതം സിനിമയായതിന് പിന്നാലെയാണ് ഇന്ത്യൻ ക്രിക്കറ്റിലെ തന്നെ ഏറെ ആരാധകരുള്ള സൗരവ് ഗാംഗുലിയുടെ ബയോപിക്കും പുറത്തിറക്കാനുള്ള ശ്രമം നടക്കുന്നത്.
