ഭാരതത്തിന്റെ പാരമ്പര്യവും സംസ്കാരവും പേറികൊണ്ടാണ് പുതിയ പാർലമെന്റ് മന്ദിരം പ്രധാനമന്ത്രി നരേന്ദ്രമോദി രാജ്യത്തിന് സമർപ്പിച്ചത്. നിലവിളക്ക് കൊളുത്തിയാണ് പാർലമെന്റ് കെട്ടിടം പ്രധാനമന്ത്രി ഉദ്ഘാടനം ചെയ്തത്. ശൈവ മഠങ്ങളിലെ പുരോഹിതന്മാരുടെ സാന്നിധ്യത്തിൽ ലോക്‌സഭാ സ്പീക്കറുടെ ഇരിപ്പടത്തിനരികിൽ ചെങ്കോൽ സ്ഥാപിക്കുകയും ചെയ്തു. ഭാരതത്തിന്റെ സംസ്കാരം വെളിപ്പെടുത്തുന്ന ചടങ്ങിനെ പ്രശംസിച്ച് നിരവധി പേരാണ് രംഗത്തു വന്നിരിക്കുന്നത്. ഇപ്പോഴിതാ, ചരിത്ര ദിനത്തിന് സാക്ഷ്യം വഹിക്കാൻ സാധിച്ചതിൽ സന്തോഷമുണ്ടെന്ന് പറയുകയാണ് ഗായകൻ അനൂപ് ശങ്കർ.
പാർലമെന്റ് മന്ദിരം ഉദ്ഘാടനം ചെയ്യുന്ന ചിത്രങ്ങൾ പങ്കുവെച്ചു കൊണ്ടുള്ള പ്രധാനമന്ത്രിയുടെ ഫേയ്സ്ബുക്ക് പോസ്റ്റിന് താഴെയാണ് സന്തോഷം പ്രകടിപ്പിച്ചു കൊണ്ട് അനൂപ് ശങ്കർ കമന്റ് ചെയ്തിരിക്കുന്നത്. ‘ഇത്തരമൊരു ചരിത്ര ദിനത്തിന് സാക്ഷ്യം വഹിക്കാൻ കഴിഞ്ഞതിൽ ഞങ്ങൾ ഭാഗ്യവാന്മാർ! നമ്മുടെ പാരമ്പര്യങ്ങളും സംസ്കാരവും ആഘോഷിച്ചുകൊണ്ട് രാജ്യം ഉയരത്തിൽ പറക്കട്ടെ’.
‘നമ്മുടെ പൈതൃകങ്ങളും സാംസ്കാരിക സംവിധാനങ്ങളും അർഹമായ ആദരവോടെയും തീക്ഷ്ണതയോടെയും തിരികെ കൊണ്ടുവരുന്നത് കാണുന്നതിൽ അഭിമാനിക്കുന്നു. പുതിയ പാർലമെന്റ് മന്ദിരം രാജ്യത്തിന്റെ നിരവധി ചരിത്ര മുഹൂർത്തങ്ങൾക്ക് നാഴികക്കല്ലായി വർത്തിക്കട്ടെ. വന്ദേമാതരം’- എന്നാണ് അനൂപിന്റെ വാക്കുകൾ.
