ന്യൂഡൽഹി : ‘ദി കശ്മീർ ഫയൽസ്’, ‘കാർത്തികേയ 2’ എന്നിവയുടെ നിർമ്മാതാവ് അഭിഷേക് അഗർവാളുമായി കൈകോർത്ത് പാൻ ഇന്ത്യൻ സിനിമ ഒരുക്കാൻ നടൻ രാം ചരൺ . ഇരുവരും ചേർന്ന് ഇന്ത്യൻ സ്വാതന്ത്ര്യ സമരത്തെ ആസ്പദമാക്കിയുള്ള ചിത്രമാണ് നിർമ്മിക്കുന്നത് . നിഖിൽ സിദ്ധാർത്ഥും അനുപം ഖേറും പ്രധാന കഥാപാത്രങ്ങളെ അവതരിപ്പിക്കുന്ന ഈ ചിത്രത്തിന്റെ പേര് ‘ദി ഇന്ത്യ ഹൗസ്’ എന്നാണ്. ചിത്രത്തിന്റെ ടൈറ്റിൽ അനൗൺസ്മെന്റ് വീഡിയോയും പുറത്തിറങ്ങി.
“നമ്മുടെ മഹാനായ സ്വാതന്ത്ര്യ സമര സേനാനി വീർ സവർക്കറുടെ 140-ാം ജന്മവാർഷികത്തിൽ, ഞങ്ങളുടെ അടുത്ത പാൻ-ഇന്ത്യ സിനിമ – ദി ഇന്ത്യ ഹൗസ് ഞങ്ങൾ പ്രഖ്യാപിക്കുന്നു.” രാം ചരൺ കുറിച്ചു . രാം വംശി കൃഷ്ണയാണ് ഈ ചിത്രം സംവിധാനം ചെയ്യുന്നത് .രാം ചരണിന്റെ വി മെഗാ പിക്ചേഴ്സും അഭിഷേക് അഗർവാളിന്റെ അഭിഷേക് അഗർവാൾ ആർട്സും സംയുക്തമായാണ് ചിത്രം നിർമ്മിക്കുന്നത്. ലണ്ടനിലെ ഒരു ബോംബ് സ്ഫോടനമാണ് ചിത്രത്തിന്റെ ഇതിവൃത്തം.
ഈ ചിത്രത്തിൽ അനുപം ഖീർ വിഖ്യാത സ്വാതന്ത്ര്യ സമര സേനാനി ശ്യാംജി കൃഷ്ണ വർമ്മയുടെ വേഷത്തിൽ എത്തുമ്പോൾ നിഖിൽ സിദ്ധാർത്ഥിന്റെ കഥാപാത്രത്തിന് ‘ശിവ’ എന്നാണ് . ദയാനന്ദ സരസ്വതി കാണിച്ച പാത പിന്തുടരാൻ വാദിച്ച വിപ്ലവകാരിയായ ശ്യാംജി കൃഷ്ണ വർമ്മ സാംസ്കാരിക ദേശീയതയുടെ തുടക്കക്കാരിൽ ഒരാളാണ് . 1905-ൽ അദ്ദേഹം ‘ഇന്ത്യ ഹൗസ്’, ‘ദി ഇന്ത്യൻ സോഷ്യോളജിസ്റ്റ്’ എന്നിവ സ്ഥാപിച്ചു.
പിന്നീട് ഈ ഇന്ത്യാ ഹൗസ് വിപ്ലവകാരികളുടെ യോഗങ്ങൾക്കുള്ള പ്രധാന വേദിയായി. അക്കാലത്ത് ബ്രിട്ടനിലെ ഇന്ത്യൻ ദേശീയതയുടെ പ്രധാന സൈറ്റായിരുന്നു ഇത്. കാശിയിലെ ബ്രാഹ്മണർ അദ്ദേഹത്തിന് പണ്ഡിറ്റ് പദവി നൽകി ആദരിച്ചു. അദ്ദേഹം തൊഴിൽപരമായി അഭിഭാഷകനായിരുന്നു. വൈദിക തത്ത്വചിന്തയിൽ പണ്ഡിതൻ കൂടിയായിരുന്നു അദ്ദേഹം. ബ്രിട്ടീഷുകാരോട് ആവർത്തിച്ച് അപേക്ഷിക്കാനുള്ള കോൺഗ്രസ് പാർട്ടിയുടെ തീരുമാനങ്ങൾക്ക് അദ്ദേഹം പൂർണ്ണമായും എതിരായിരുന്നു.
ചിത്രം ഇന്ത്യയിലെ പല പ്രധാന ഭാഷകളിലും പുറത്തിറങ്ങും, കൂടാതെ ഇത് വിദേശ ഭാഷകളിലും നിർമ്മിക്കും. കാമറൂൺ ബ്രൈസൺ ഛായാഗ്രഹണം നിർവഹിക്കും. ചിത്രവുമായി ബന്ധപ്പെട്ട മറ്റ് അഭിനേതാക്കളുടെ വിവരങ്ങൾ പിന്നീട് പുറത്ത് വിടും. ശ്യാംജി കൃഷ്ണ വർമ്മയ്ക്ക് ശേഷം വീർ സവർക്കറാണ് ലണ്ടനിലെ വിപ്ലവകാരികളുടെ നേതാവായത്. അതിനാലാണ് അദ്ദേഹത്തിന്റെ ജന്മദിനത്തിൽ ചിത്രം പ്രഖ്യാപിച്ചത്.
