എല്ലാവർക്കും അവരുടേതായ ഹോബികളുണ്ട്. ചിലർക്ക് യാത്രകൾ, മറ്റ് ചിലർക്ക് ഭക്ഷണം, വേറെ ചിലർക്ക് ഷോപ്പിംഗ്.. ഇതെല്ലാം ഒരുമിച്ച് ഹോബികളായി കൊണ്ടുനടക്കുന്നവരുമുണ്ട്. ഇത്തരത്തിൽ ഹോബിയുടെ ഭാഗമായി ദിവസവും 70 ലക്ഷം രൂപ ചിലവഴിക്കുന്ന വീട്ടമ്മയാണ് സോഷ്യൽ മീഡിയയിൽ ചർച്ചയാകുന്നത്. ദുബായിൽ നിന്നുള്ള കോടീശ്വരന്റെ ഭാര്യയായ ‘സൗദി’യുടേതാണ് ഈ ആഡംബര ജീവിതം.
ഷോപ്പിംഗ്, ഭക്ഷണം, യാത്ര എന്നിവയാണ് സൗദിയുടെ ഹോബികൾ. ഇതിന്റെയെല്ലാം കണ്ണഞ്ചിപ്പിക്കുന്ന ചിത്രങ്ങളും വീഡിയോകളും സൗദി സോഷ്യൽ മീഡിയയിൽ പോസ്റ്റ് ചെയ്യാറുമുണ്ട്. അതുകൊണ്ട് തന്നെ ടിക്ക്ടോക്കിലും ഇൻസ്റ്റഗ്രാമിലും ദശലക്ഷക്കണക്കിന് ഫോളോവേഴ്സാണ് സൗദിക്കുള്ളത്. ഡിസൈനർ ബാഗുകളോടും ആഡംബര കാറുകളോടും വിനോദസഞ്ചാര കേന്ദ്രങ്ങളോടും സൗദിക്ക് വലിയ ഭ്രമമാണ്.
ദുബായിൽ താമസിക്കുന്ന കോടീശ്വരൻ ജമാൽ ബിൻ നദക് ആണ് സൗദിയുടെ ഭർത്താവ്. ഇദ്ദേഹത്തോടൊപ്പം നിരവധി രാജ്യങ്ങളിലേക്ക് യാത്ര ചെയ്യുന്ന ചിത്രങ്ങൾ സൗദി നിരന്തരമായി പങ്കുവയ്ക്കാറുണ്ട്. അടുത്തിടെ മാലിദ്വീപിലും സേഷെൽസിലും ഇരുവരും സന്ദർശനം നടത്തിയിരുന്നു. അടുത്തതായി ജപ്പാനിലേക്ക് പോകണമെന്നാണ് സൗദി പറയുന്നത്. വിശിഷ്ടമായ വസ്ത്രങ്ങളും വിലകൂടിയ സമ്മാനങ്ങളും ഇടയ്ക്കിടെ ഇരുവരും പരസ്പരം കൈമാറും. ആഡംബര പൂർണമായ ഡൈനിംഗ് അനുഭവങ്ങളും, ഡിസൈനർ വസ്ത്രങ്ങളും, മാനിക്യൂറുകളും എല്ലാം സൗദിക്ക് വലിയ ഇഷ്ടമാണ്.
സസെക്സിൽ ജനിച്ച സൗദി ആറുവയസുള്ളപ്പോൾ കുടുംബത്തോടൊപ്പം ദുബായിലേക്ക് കുടിയേറിയതാണ്. അവിടെയൊരു യൂണിവേഴ്സിറ്റിയിൽ വച്ചാണ് ജമാലിനെ കണ്ടുമുട്ടുന്നത്. സൗദി അറേബ്യയാണ് അദ്ദേഹത്തിന്റെ സ്വദേശം. ഇപ്പോൾ ഇരുവരും താമസിക്കുന്നത് ദുബായിലാണ്. രണ്ട് വർഷത്തിന് മുമ്പായിരുന്നു ജമാലുമായുള്ള സൗദിയുടെ വിവാഹം.
