ആത്മീയതയ്ക്കും വിശ്വാസങ്ങൾക്കും പ്രാധാന്യം നൽകി നിർമ്മിച്ചിരിക്കുന്ന തീം പാർക്കാണ് സായ് തീർത്ഥ്. രാജ്യത്തെ ആദ്യത്തെ ഡിവോഷണൽ തീം പാർക്ക് മഹാരാഷ്ട്രയിലെ അഹ്മദ്നഗറിൽ ഷിർദ്ദിയിലാണ് സ്ഥിതി ചെയ്യുന്നത്. ലങ്കാ ദഹനിലെ 5ഡി ഷോ മുതൽ ദ്വാരക വരെ പാർക്കിൽ ഉൾക്കൊള്ളുന്നു. മണിക്കൂറുകളോളം കണ്ടാലും മതിവരാത്ത അത്ര മാത്രം ആകർഷകമാണ് ഇവിടം. ദ്വാരകാമായി, ലങ്കാ ദഹൻ, സബ്ക മാലിക് ഏക്, തീർത്ഥ യാത്ര എന്നീ നാല് പ്രധാന ആകർഷണങ്ങളുള്ള ഒരു വാസ്തുവിദ്യാ വിസ്മയമാണ് സായ് തീർത്ഥ്.
ഭക്തി, വിനോദം, സാങ്കേതിക വിദ്യകൾ എന്നീ മൂന്നു കാര്യങ്ങളുടെ ഏറ്റവും മികച്ച കൂടിച്ചേരലാണ് സായ് തീർഥിൽ കാണാനാകുന്നത്. ഭാരതത്തിലെ പ്രധാനപ്പെട്ട പത്ത് ക്ഷേത്രങ്ങളിലൂടെയുള്ള ആത്മീയ യാത്രയാണ് ഇവിടെത്തെ തീർത്ഥയാത്ര. ബദരിനാഥ്, കേദാർനാഥ്, പുരി ജഗനാഥ ക്ഷേത്രം, ധ്വാരകാ ക്ഷേത്രം, തിരുപ്പതി തിരുമല ബാലാജി ക്ഷേത്രം, മധുര മീനാക്ഷി ക്ഷേത്രം എന്നിവ ഉൾപ്പെടുന്ന പത്ത് ക്ഷേത്രങ്ങളുടെ മാതൃകകളിലൂടെ തീർത്ഥയാത്ര നടത്താവുന്നതാണ്. പൂർണ്ണതയിലും അച്ചടിച്ചപോലെയുമാണ് ഈ പത്ത് ക്ഷേത്രങ്ങളുടെയും മാതൃക ഇവിടെ ഒരുക്കിയിട്ടുള്ളത്.
ഹനുമാന്റെ ലങ്ക ദഹനത്തിനും ഇവിടെ സാക്ഷിയാകാവുന്നതാണ്. ശ്രീ രാമന്റെ നിർദ്ദേശ പ്രകാരം സീതാ ദേവിയെ തേടി ലങ്കയിലെത്തിയ ഹനുമാന്റെ ലങ്കാ ദഹനം 5ഡി ടെക്നോളജിയിലാണ് ഇവിടെ കാണിക്കുന്നത്. ചലിക്കുന്ന സീറ്റുകൾ, വാട്ടർ ജെറ്റ്, വിൻഡ് മെഷീൻ, മറ്റു സ്പെഷ്യൽ എഫക്ടുകൾ എന്നിവയെല്ലാം ചേർന്നുള്ള ഈ ഷോ യഥാർത്ഥത്തിൽ നേരിട്ട് കാണുന്ന പോലുള്ള അനുഭവമാണ് നൽകുന്നത്.
സായ് ബാബയുടെ ജീവിതത്തെ അറിയുവാനും മനസ്സിലാക്കുവാനും സഹായിക്കുന്ന വിധത്തിൽ സൃഷ്ടിച്ചിരിക്കുന്ന ഒരുപാട് വ്യത്യസ്തങ്ങളായ കാഴ്ചകൾ ഇവിടെയുണ്ട്. ദ്വാരകാമായി എന്നത് 10 മിനിറ്റ് ദൈർഘ്യമുള്ള ഒരു റോബോട്ടിക്, ആനിമേട്രോണിക് ഷോ ആണ്. ഇതിൽ സായി ബാബ ജീവിതത്തിലേക്ക് വരികയും തന്റെ അനുയായികളെ വളരെ വ്യക്തിപരമായ രീതിയിൽ അഭിസംബോധന ചെയ്യുന്നു. 250 പേർക്കാണ് ഒരേ സമയം കാണാൻ സാധിക്കുന്നത്. ഇവ കൂടാതെ പാർക്കിൽ ഒരു റസ്റ്റോറന്റും ഒരു മാർക്കറ്റും കൂടി കാണം. സായ് ബാബയുടെ ജീവതം പറയുന്ന സബ്കാ മാലിക് ഏക് എന്ന സിനിമയും ഇവിടെ പ്രദർശിപ്പിക്കുന്നു. രാവിലെ 10.00 മുതൽ വൈകിട്ട് 6.00 വരെയാണ് സായ് തീർത്ഥ് ഡിവോഷണൽ പാർക്കിന്റെ പ്രവർത്തന സമയം.
Comments