യാത്രക്കാർക്ക് സുരക്ഷ നൽകുന്ന ഒന്നാണ് എയർബാഗുകൾ. കാറുകളിൽ എയർബാഗുകളുടെ എണ്ണം കൂടും തോറും നമ്മുടെ സുരക്ഷിതത്വം വർദ്ധിക്കും. യാത്രക്കാരുടെ സുരക്ഷിതത്വം കണക്കാക്കി പുതിയതായി പുറത്തിറങ്ങുന്ന എല്ലാ കാറുകളിലും രണ്ട് എയർബാഗുകൾ നിബന്ധമാക്കിയിട്ടുണ്ട്. മാത്രമല്ല, എട്ടു സീറ്റുള്ള കാറുകളിൽ ആറ് എയർബാഗുകൾ വേണമെന്നും കേന്ദ്ര ഗതാഗതമന്ത്രാലയം ഉത്തരവിറക്കിയിട്ടുണ്ട്. ഡ്രൈവർക്കും മറ്റ് യാത്രക്കാർക്കും വാഹനങ്ങളിൽ സുരക്ഷ ഉറപ്പാക്കുന്ന പ്രധാന ഘടകമാണ് എയർബാഗുകൾ. എന്നാൽ, പലപ്പോഴും നമുക്ക് പറ്റുന്ന ചില അബദ്ധങ്ങൾ കാരണം എയർബാഗുകൾ പ്രവർത്തിക്കാതെ വരികയും അപകടങ്ങൾ സംഭവിക്കുകയും ചെയ്യാറുണ്ട്. അതുകൊണ്ട് തന്നെ എയർബാഗുള്ള കാറുകളിൽ യാത്ര ചെയ്യുമ്പോൾ ചില കാര്യങ്ങൾ നാം ശ്രദ്ധിക്കണം. യാത്രക്കാർ ശ്രദ്ധിക്കേണ്ട അഞ്ചു കാര്യങ്ങൾ ഏതെല്ലാമാണെന്ന് നോക്കാം.
ബുൾ ബാർ ഘടിപ്പിക്കരുത്
വാഹനത്തിന്റെ സുരക്ഷക്കും സൗന്ദര്യത്തിനുമായി ഘടിപ്പിക്കുന്ന ഒന്നാണ് ബുൾ ബാറുകൾ. മിക്കവരും സൗന്ദര്യത്തിന് വേണ്ടി മാത്രമാണ് വിവിധ തരത്തിലുള്ള ബുൾ ബാറുകൾ വാഹനത്തിന് മുന്നിൽ ഘടിപ്പിക്കുന്നത്. ചെറിയ തരത്തിലുള്ള തട്ടലുകളും പോറലുകളും ബുൾ ബാർ ഘടിപ്പിക്കുന്നതു കൊണ്ട് തടയാം എന്നത് നേരുതന്നെ. എന്നാൽ, പലപ്പോഴും ബുൾ ബാറുകളുള്ള വാഹനങ്ങളിൽ എയർബാഗുകൾ പ്രവർത്തിക്കാതെ വരാറുണ്ട്. അപകടം സംഭവിക്കുമ്പോൾ ബുൾ ബാറുകൾ ഉള്ളതിനാൽ എയർ ബാഗുകളുടെ സെൻസർ പ്രവർത്തിക്കാതെ വരികയും എയർബാഗ് പുറത്തുവരാതിരിക്കുകയും ചെയ്യും.
കാല് ഡാഷ്ബോർഡിൽ വെയ്ക്കാതിരിക്കുക
ദീർഘദൂര യാത്രകളിൽ പലപ്പോഴും നമ്മൾ ചെയ്യുന്നതാണ് കാലുകൾ ഡാഷ്ബോർഡിൽ കയറ്റി വെയ്ക്കുന്നത്. ഇത് ഒഴിവാക്കുന്നതാണ് ഉചിതം. ഈ ശീലം അപകടങ്ങൾ വിളിച്ച് വരുത്തും. അപകടങ്ങൾ ഉണ്ടാവുമ്പോൾ എയർ ബാഗ് പുറത്തു വരും. ഈ സമയം നിങ്ങളുടെ കാല് ഡാഷ് ബോർഡിന്റെ മേലയാണ് ഇരിക്കുന്നതെങ്കിൽ കാലിന്റെ എല്ലുകൾ തകരാൻ വരെ കാരണമാകും.
ഡാഷ്ബോർഡിന് മുകളിൽ ഒന്നും വെയ്ക്കരുത്
അലങ്കാരത്തിനായി ഡാഷ്ബോർഡിന് മുകളിൽ വസ്തുക്കൾ വെയ്ക്കുന്നത് സാധാരണയായി കാണാറുള്ളതാണ്. ഇതും അപകടം വിളിച്ചു വരുത്തും. പൊട്ടിത്തെറിയിലൂടെ പുറത്തു വരുന്ന എയർബാഗുകളിലേയ്ക്ക് ഡാഷ്ബോർഡിൽ വച്ചിരിക്കുന്ന വസ്തുക്കൾ പെടും. എയർബാഗിനൊപ്പം അതിവേഗത്തിൽ പുറത്തേക്ക് തെറിക്കുന്ന ഇത്തരം വസ്തുക്കൾ നമ്മുടെ ദേഹത്ത് ഗുരുതര മുറിവുകൾ ഏൽപ്പിക്കും.
കുട്ടികളുടെ സീറ്റ് ഉപയോഗിക്കുമ്പോൾ
എയർബാഗുള്ള കാറുകളിൽ കുട്ടികളുടെ സീറ്റുകൾ ഉപയോഗിക്കുമ്പോൾ സൂഷ്മത വേണം. കുട്ടികളുടെ സീറ്റ് മുന്നിലെ പാസഞ്ചർ സീറ്റിലാണ് ഘടിപ്പിക്കുന്നതെങ്കിൽ അപകട സാധ്യത കൂടുതലാണ്. ഇത്തരം സാഹചര്യങ്ങളിൽ പാസഞ്ചർ സൈഡിലെ എയർബാഗ് ഓഫാക്കണമെന്നതാണ് വിദഗ്ദരുടെ നിർദേശം. പുറത്തേയ്ക്ക് എയർബാഗ് വരുന്നത് കുട്ടികളുടെ ശരീരത്തിന് താങ്ങാനാവുന്നതിലും വലിയ ശക്തിയിലായിരിക്കും.
സ്റ്റിയറിംഗിനോട് ചേർന്നിരിക്കരുത്
പലർക്കും സ്റ്റിയറിംഗിനോട് ചേർന്ന് വാഹനം ഓടിക്കുന്ന ശീലമുണ്ട്. എയർബാഗുള്ള വാഹനങ്ങൾ ഇത്തരത്തിൽ ഓടിക്കുന്നത് നല്ലതല്ല. ചെറിയ ഒരു പൊട്ടിത്തെറിയിലൂടെയാണ് എയർബാഗ് പുറത്തു വരുന്നത്. പൊട്ടിത്തെറി ഉണ്ടാവുമ്പോൾ ശരീരം എയർബാഗ് വരുന്ന ഭാഗത്തിന് അടുത്താണ് ഇരിക്കുന്നതെങ്കിൽ അത് വലിയ ആഘാതം സൃഷ്ടിച്ചേക്കാം. അതിനാൽ സ്റ്റിയറിംഗുമായി കൈ അകലം പാലിച്ചുകൊണ്ട് സീറ്റിൽ നന്നായി ചാരിയിരുന്ന് വാഹനം ഓടിക്കുക.
Comments