റോഡരികിൽ മരവിച്ചതുപോലെ നിൽക്കും, എത്രയുറക്കേ വിളിച്ചാലും പ്രതികരിക്കില്ല, വളരെ പതുക്കെ മാത്രം ചലിക്കും, മനുഷ്യരെ പ്രതിമകളാക്കുന്ന ‘സോംബി ഡ്രഗ്’

ന്യൂഡൽഹി: റോഡരികിൽ മരവിച്ചതുപോലെ നിൽക്കുന്ന ആളുകൾ… വിളിച്ചിട്ടും പ്രതികരിക്കാതെ, വളരെ പതുക്കെ മാത്രം ചലിക്കുന്നവർ… ഇത്തരത്തിലുള്ള ദൃശ്യങ്ങൾ അടുത്തിടെ സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്. ‘സോംബി ഡ്രഗ്’ ഉപയോഗിച്ചതാണ് എന്ന് പറഞ്ഞാണ് വീഡിയോകളും പ്രചരിക്കുന്നത്.

എന്നാൽ എന്താണ് യഥാർഥത്തിൽ ഈ ‘സോംബി ഡ്രഗ്’? ഇത് കഴിച്ചാൽ ഒരാൾക്ക് എന്താണ് സംഭവിക്കുന്നത്? എത്രത്തോളം അപകടകരമാണ്?

ആദ്യം തന്നെ പറയേണ്ടത് ‘സോംബി ഡ്രഗ്’ എന്നത് ഒരു പ്രത്യേക മരുന്നിന്റെ പേരല്ല എന്നതാണ്. ചില ലഹരിവസ്തുക്കളോ അവയുടെ കൂട്ടുകളോ ഉപയോഗിക്കുമ്പോൾ ഉണ്ടാകുന്ന കടുത്ത മയക്കം, ബോധക്കുറവ്, ചലനശേഷി കുറയൽ തുടങ്ങിയ അവസ്ഥകളെയാണ് പൊതുവെ ഈ പേരിൽ വിളിക്കുന്നത്.

ഇക്കൂട്ടത്തിൽ അടുത്തിടെ കൂടുതൽ ചർച്ചയായത് സൈലസീൻ (Xylazine) എന്ന വെറ്ററിനറി സെഡേറ്റീവാണ്. മൃഗചികിത്സയിൽ ഉപയോഗിക്കുന്ന ഈ മരുന്ന് അനധികൃത ലഹരിവസ്തുക്കളിൽ കലർത്തി ഉപയോഗിക്കുന്നതായി കണ്ടെത്തിയിട്ടുണ്ട്. ഫെന്റനിൽ പോലുള്ള ഒപിയോയിഡുകളോടൊപ്പം ഇത് ഉപയോഗിക്കുമ്പോൾ അപകടസാധ്യത കൂടുകയും ചെയ്യും.

എന്തുകൊണ്ടാണ് ആളുകൾ ‘സോംബി’യെപ്പോലെ തോന്നുന്നത്?
സൈലസീൻ കേന്ദ്ര നാഡീവ്യവസ്ഥയുടെ പ്രവർത്തനം മന്ദഗതിയിലാക്കും. ഇതോടെ വലിയ മയക്കം അനുഭവപ്പെടാം. ചുറ്റും നടക്കുന്നതൊന്നും വ്യക്തമായി മനസിലാകാതെ വരാം. പ്രതികരിക്കാനുള്ള ശേഷിയും കുറയും.

അതുകൊണ്ടാണ് ചിലർ നിൽക്കുകയോ ഇരിക്കുകയോ ചെയ്തുകൊണ്ട് വളരെ പതുക്കെ മാത്രം ചലിക്കുന്നതുപോലെ കാണപ്പെടുന്നത്. ചിലപ്പോൾ വിളിച്ചാലും പ്രതികരിക്കില്ല. ഗുരുതരമായാൽ ബോധം നഷ്ടപ്പെടുന്ന അവസ്ഥയിലേക്കും എത്താം.

എന്നാൽ എല്ലാവരിലും ഒരേ രീതിയിലായിരിക്കണമെന്നില്ല. ഉപയോഗിച്ച ലഹരിവസ്തു ഏതാണെന്നും എത്ര അളവിലാണ് ഉപയോഗിച്ചതെന്നും മറ്റ് ലഹരിവസ്തുക്കൾക്കൊപ്പം എടുത്തിട്ടുണ്ടോയെന്നും വ്യക്തിയുടെ ആരോഗ്യനില എന്താണെന്നും അനുസരിച്ചായിരിക്കും ലക്ഷണങ്ങൾ.

വെറും ഉറക്കമെന്ന് കരുതി മാറിനിൽക്കരുത്
വളരെ മയങ്ങിയോ പ്രതികരിക്കാതെയോ ഒരാളെ കണ്ടാൽ ‘ലഹരിയിലാണ്’ എന്ന് കരുതി അവഗണിക്കരുതെന്നാണ് ഡോക്ടർമാരുടെ മുന്നറിയിപ്പ്. അത് ഓവർഡോസിന്റെ ലക്ഷണമാകാം.

ശ്വാസം വളരെ പതുക്കെയാകുക, രക്തത്തിലെ ഓക്സിജൻ കുറയുക, രക്തസമ്മർദം താഴുക, ഹൃദയമിടിപ്പിൽ ക്രമക്കേട് ഉണ്ടാകുക തുടങ്ങിയ ഗുരുതര പ്രശ്നങ്ങൾ ഉണ്ടാകാം. ബോധം നഷ്ടപ്പെടാനും കോമയിലാകാനും സാധ്യതയുണ്ട്. ഗുരുതരമായാൽ മരണം വരെ സംഭവിക്കാം.

ഓവർഡോസ് ആണെന്ന് സംശയിക്കേണ്ട ലക്ഷണങ്ങൾ
വിളിച്ചിട്ടും ഉണരാത്ത അവസ്ഥ, വളരെ പതുക്കെയോ ക്രമരഹിതമായോ ഉള്ള ശ്വാസം, അമിതമായ ആശയക്കുഴപ്പം, ചുണ്ടുകളോ ചർമ്മമോ നീലനിറത്തിലാകുക, ബോധം നഷ്ടപ്പെടുക, അപസ്മാരം തുടങ്ങിയവ ശ്രദ്ധിക്കേണ്ട ലക്ഷണങ്ങളാണ്.

ഇക്കാര്യങ്ങൾ ചെയ്യരുത്
അമിതമായി മയങ്ങിയ ഒരാളെ നിർബന്ധിച്ച് വെള്ളമോ ഭക്ഷണമോ കാപ്പിയോ നൽകാനും ശ്രമിക്കരുത്. ബോധം കുറഞ്ഞ നിലയിലുള്ള വ്യക്തിക്ക് ഇവ നൽകുന്നത് ശ്വാസംമുട്ടലിന് കാരണമാകാം.

നടക്കാൻ നിർബന്ധിക്കുകയോ ഒറ്റയ്‌ക്ക് വിടുകയോ ചെയ്യരുത്. അസാധാരണമായ കൂർക്കംവലി കേൾക്കുന്നതും വളരെ പതുക്കെയുള്ള ശ്വാസോച്ഛ്വാസവും സാധാരണ ഉറക്കമാണെന്ന് കരുതുകയും അരുത്.

പ്രധാനമായി, ‘സോംബി ഡ്രഗ്’ എന്നത് ഒരു പ്രത്യേക ലഹരിവസ്തുവിന്റെ പേര് മാത്രമല്ല. പല മരുന്നുകളുടെയും ലഹരിവസ്തുക്കളുടെയും ഉപയോഗം ഇത്തരം ലക്ഷണങ്ങൾക്ക് കാരണമാകാം. അതുകൊണ്ടുതന്നെ ഇത്തരം അവസ്ഥയിലുള്ള ഒരാളെ കണ്ടാൽ സ്വയം രോഗനിർണയം നടത്താതെ, ഗുരുതര ലക്ഷണങ്ങളുണ്ടെങ്കിൽ ഉടൻ വൈദ്യസഹായം തേടുകയാണ് ഏറ്റവും സുരക്ഷിതമായ മാർഗം.