ലോകമെമ്പാടും വലിയൊരു ആരാധകവൃത്തം തന്നെയുള്ള താരമാണ് അമിതാഭ് ബച്ചൻ. എല്ലാ ഞായറാഴ്ചകളിലും മുബൈയിലെ വസതിയിൽ വലിയൊരു കൂട്ടം ആരാധകരാണ് ബച്ചനെ കാണാനായി എത്തുന്നത്. ഇതിൽ ഏറെ ശ്രദ്ധേയമായ ഒരു കാര്യം എന്തെന്നാൽ തന്റെ ആരാധകരെ കാണാൻ എത്തുമ്പോൾ നടൻ ചെരുപ്പിടാറില്ല. ഇപ്പോഴിതാ ആരാധകർക്ക് മുന്നിൽ ചെരുപ്പിടാതെ പ്രത്യക്ഷപ്പെടുന്നതിന്റെ രഹസ്യം പങ്കുവെക്കുകയാണ് അമിതാഭ് ബച്ചൻ.
സോഷ്യൽ മീഡിയയിലൂടെയാണ് അദ്ദേഹം ഇക്കാര്യം പങ്കുവെച്ചത്. ആരാധകർക്കൊപ്പമുള്ള ചിത്രം പങ്കുവെച്ചുകൊണ്ടാണ് അദ്ദേഹം ഇക്കാര്യം വെളിപ്പെടുത്തിയത്. തന്നെ കാണാൻ എത്തുന്ന ആരാധകർ ദൈവത്തെപോലെയാണെന്നും അതിനാലാണ് താൻ ചെരുപ്പിടാത്തതെന്നും ബച്ചൻ പറഞ്ഞു. പലരും തന്നോട് ദേഷ്യത്തോടെ ചോദിക്കാറുണ്ട് എന്തുകൊണ്ടാണ് ആരാധകരെ കാണാൻ പോകുമ്പോൾ ചെരുപ്പിടാത്തതെന്ന്. അപ്പോൾ ഞാൻ അവരോട് പറയും ഞാൻ അങ്ങനെ ചെയ്യുമെന്ന്. നിങ്ങൾ നഗ്നപാദരായി ക്ഷേത്രത്തിൽ പോകാറില്ലെ അതുപോലെയാണ് എന്നെക്കാണാൻ എല്ലാ ഞായറാഴ്ചയും എത്തുന്ന ആരാധകർ എന്റെ ക്ഷേത്രമാണെന്നും ചിത്രത്തോടൊപ്പം ബച്ചൻ കുറിച്ചു.
നടന്റെ വാക്കുകൾ ഇതിനോടകം വൈറലായിട്ടുണ്ട്. പ്രൊജക്ട് കെയുടെ സെറ്റിൽ വെച്ചുണ്ടായ അപകടത്തിന് ശേഷം വീണ്ടും അഭിനയത്തിൽ നടൻ സജീവമായിട്ടുണ്ട്. ചിത്രീകരണത്തിനിടെ അപകടം സംഭവിച്ച നടൻ വിശ്രമത്തിലായിരുന്നു. അമിതാഭ് ബച്ചൻ, പ്രഭാസ് എന്നിവരെ കേന്ദ്ര കഥാപാത്രങ്ങളാക്കി നാഗ് അശ്വിൻ സംവിധാനം ചെയ്യുന്ന ചിത്രമാണ് പ്രോജക്ട് കെ.
