മലയാള സിനിമയിൽ താരപുത്രന്മാരുടെയും താരപുത്രിമാരുടെയും അരങ്ങേറ്റകാലമാണ്. നിലവിൽ മിക്ക താരങ്ങളുടെയും മക്കൾ വെള്ളിത്തിരയിൽ സജീവമായുണ്ട്. ഇപ്പോഴിതാ ബാലതാരമായി അരങ്ങേറ്റം കുറിച്ച ഒരു താരപുത്രൻ കൂടി നായക മുൻനിരയിലേയ്‌ക്ക് എത്തുന്നു. ഹാസ്യ കഥാപാത്രങ്ങളിലൂടെയും സ്വഭാവ വേഷങ്ങളിലൂടെയും മലയാളികൾക്ക് സുപരിചിതനായ സലിം കുമാറിന്റെ മകൻ ചന്തു സലിം കുമാറാണ് മലയാള സിനിമയുടെ പുതിയ നായകനാകാൻ ഒരുങ്ങുന്നത്. ചിദംബരം സംവിധാനം ചെയ്യുന്ന മഞ്ഞുമ്മൽ ബോയ്‌സ് എന്ന ചിത്രത്തിലാണ് പ്രധാന കഥാപാത്രമായി ചന്തു എത്തുന്നത്.
ഇപ്പോൾ ചന്തു സോഷ്യൽ മീഡിയയിൽ പങ്കുവെച്ച ഒരു കുറിപ്പും ചിത്രവും വൈറലാവുകയാണ്. നടൻ ലാലിനൊപ്പമുള്ള ചിത്രമാണ് ചന്തു പങ്കുവച്ചിരിക്കുന്നത്. 23 വർഷങ്ങൾക്കു മുൻപ് ലാലിനൊപ്പമുള്ള ഒരു ചിത്രവും കൂട്ടത്തിൽ ചന്തു പങ്കുവെച്ചിട്ടുണ്ട്.
’23 വർഷങ്ങൾക്ക് മുൻപ്, തെങ്കാശിപ്പട്ടണം സിനിമയുടെ വിജയാഘോഷം റിനയിസ്സൻസ് ഹോട്ടലിൽ നടക്കുന്ന സമയത്ത്, ആദ്യമായി ഒരുപാട് ആളുകളെ ഒരുമിച്ചു കാണുന്നതിന്റെ ഭയപ്പാടിൽ, മാറിയിരുന്നിരുന്ന ആ കൊച്ചുകുട്ടിയെ, ഒരാൾ എടുത്തുകൊണ്ട് വന്ന് മടിയിൽ ഇരുത്തി ഫോട്ടോ എടുപ്പിച്ചു. 23 വർഷങ്ങൾക്ക് ശേഷം മഞ്ഞുമ്മൽ ബോയ്‌സിന്റെ പൂജ കൊടൈക്കനാലിൽ നടക്കുന്ന സമയത്ത് ആദ്യമായി ഒരു സിനിമയിൽ മുഴുനീള കഥാപാത്രം ചെയ്യുന്നതിന്റെ പേടിയും, പിരിമുറുക്കവും എല്ലാം പ്രകടിപ്പിച്ചു നിൽക്കുന്ന ആ ചെറുപ്പക്കാരനെ, ഒരു കൊച്ചുകുട്ടിയെ പോലെന്നോണം അന്നും ഒരാൾ അടുത്തേക്ക് വിളിച്ചു നിർത്തി ഫോട്ടോ എടുപ്പിച്ചു. വർഷങ്ങൾക്ക് ശേഷം ആ കാര്യം അദ്ദേഹത്തോട് വീണ്ടും പറഞ്ഞപ്പോൾ ഇതൊക്കെ ചെറിയ കാര്യങ്ങൾ അല്ലേ എന്നായിരുന്നു അദ്ദേഹത്തിന്റെ മറുപടി. ചെറിയ കാര്യങ്ങൾ ഒന്നും അത്ര ചെറുതല്ല എന്നായിരുന്നു ചിത്രത്തിനൊപ്പമുള്ള ചന്തുവിന്റെ കുറിപ്പ്.
ചിത്രത്തിൽ സൗബിൻ ഷാഹീർ, ഗണപതി, ശ്രീനാഥ് ഭാസി, ബാലു വർഗ്ഗീസ്, ദീപക് തുടങ്ങിയവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്.
