അരിക്കൊമ്പനെക്കാളും ശക്തനായ പുതിയ ഒരാളെത്തിയിട്ടുണ്ട്, അരിപ്രാണി! അടുക്കളയിൽ ചാക്കിലാണ് അരി സൂക്ഷിച്ചുവെച്ചിരിക്കുന്നതെങ്കിൽ അൽപം സൂക്ഷിക്കുന്നതാണ് നല്ലത്.രാത്രി ആകുന്നതോടെ ഇവ പറന്നെത്തി കിടപ്പുമുറിയിലും അടുക്കളയിലും വരെ എത്തുന്നു. ഇതോടെ ഉറക്കം കെടുത്തുമെന്നതിൽ സംശയമില്ല.
ഒരു പ്രാണി 600 വരെ മുട്ടയിടും എന്നാണ് പറയപ്പെടുന്നത്. നേരം ഇരുട്ടാകുന്നതോടെ അരിപ്രാണികൾ കൂട്ടത്തോടെ ചാക്കിൽ നിന്നിറങ്ങും. പറന്ന് കിലോമീറ്ററുകൾ വരെ ഇര തേടി വെളിച്ചമുള്ള വീടുകളിലും കെട്ടിടങ്ങളിലും എത്തുന്നു. വാതിൽ തുറന്നിടുന്ന വീടുകളിലാണ് പ്രാണി ശല്യം രൂക്ഷം. നേരം പുലരും മുൻപേ തിരികെ ചാക്കിൽ കയറും. ശരീരത്തിൽ കയറുകയും വസ്ത്രങ്ങൾ ഇറുകിയ ഭാഗത്ത് പോലും കടന്നെത്തി ദ്രാവകം പൊഴിക്കുകയും ചെയ്യുന്നു ഇവ.
സാധാരണയായി റബർ തോട്ടങ്ങളിൽ കാണുന്ന ഓട്ടുറുമി സമാന രൂപത്തിലുള്ള കൊമ്പ് ഇല്ലാത്ത ഇത്തരം പ്രാണികൾ ആദ്യമായാണ് അരിച്ചാക്കുകളിൽ കണ്ടെത്തിയത്. ജനവാസമേറിയ ഇടങ്ങളിലാണ് ഇവയുടെ ശല്യം. മഴ വന്നാൽ ഇതിന്റെ വാസവും സഞ്ചാരവും നിലയ്ക്കും.
