സോഷ്യൽ മീഡിയയിൽ നിന്നും ഇടവേളയെടുക്കുകയാണെന്ന് പ്രഖ്യാപിച്ച് ഇൻസ്റ്റഗ്രാം പോസ്റ്റുകളെല്ലാം അപ്രത്യക്ഷമാക്കിയ നടി കജോൾ തിരിച്ചുവന്നു. പോസ്റ്റുകളെല്ലാം ഡിലീറ്റ് ചെയ്തുവെന്ന് ആരാധകരിൽ പലരും തെറ്റിദ്ധരിച്ചുവെങ്കിലും അതെല്ലാം ആർക്കൈവ്സിലേക്ക് മാറ്റിയാണ് കജോൾ അപ്രത്യക്ഷയായത്. തിരിച്ചുവന്നതോടെ കാണാതായ പോസ്റ്റുകളെല്ലാം പ്രത്യക്ഷപ്പെട്ടു. എന്നാൽ കജോൾ പ്രധാന കഥാപാത്രത്തിലെത്തുന്ന പുതിയ സീരീസിന്റെ പ്രമോഷന്റെ ഭാഗമായിട്ടായിരുന്നു ‘ഇടവേള പരീക്ഷണം’ നടത്തിയതെന്ന കാര്യം പുതിയ പോസ്റ്റ് വന്നതോടെയാണ് ആരാധകർക്ക് ബോധ്യമായത്.
ജീവിതത്തിലെ ഏറ്റവും വലിയ പരീക്ഷണം നേരിടുകയാണെന്നും ഡിജിറ്റൽ പ്ലാറ്റ്ഫോമുകളിൽ നിന്നെല്ലാം മാറി നിൽക്കുകയാണെന്നുമായിരുന്നു കജോൾ രാവിലെ കുറിച്ചിരുന്നത്. ഇതിന് പിന്നാലെ ഇൻസ്റ്റഗ്രാമിലെ അതുവരെയുള്ള പോസ്റ്റുകൾ അപ്രത്യക്ഷമാക്കി കജോൾ ‘മുങ്ങി.’ സംഭവം വാർത്തയാകുകയും ആരാധകർ വലിയ രീതിയിൽ ചർച്ചയാക്കുകയും ചെയ്ത് മണിക്കൂറുകൾക്ക് പിന്നാലെ നടി വീണ്ടും ഇൻസ്റ്റഗ്രാമിൽ പ്രത്യക്ഷപ്പെടുകയായിരുന്നു.
ദി ട്രയൽ എന്ന സീരീസിന്റെ മോഷൻ പോസ്റ്റർ പുറത്തുവിട്ടായിരുന്നു താരം വീണ്ടും പ്രത്യക്ഷപ്പെട്ടത്. ഡിസ്നി പ്ലസ് ഹോട്ട്സ്റ്റാറിലൂടെ സ്ട്രീം ചെയ്യാൻ പോകുന്ന ഷോ ആണ് ദി ട്രയൽ. ജൂൺ 12ന് ഷോയുടെ ട്രെയിലർ പുറത്തിറങ്ങുമെന്നും ചടങ്ങിൽ പങ്കെടുക്കുമെന്നും താരം അറിയിച്ചു. കോടതി മുറിക്കുള്ളിൽ നടക്കുന്ന സംഭവവികാസങ്ങളും ‘വിചാരണ’യുമാണ് സീരീസിന്റെ പ്രമേയം. ഈ ‘ട്രെയലി’നെക്കുറിച്ചാണ് നേരത്തെ കജോൾ പരാമർശിച്ചതെന്ന് മോഷൻ പോസ്റ്റർ പുറത്തു വന്നപ്പോഴാണ് ആരാധകർക്ക് പിടികിട്ടിയത്.
