ന്യൂഡൽഹി: ഓടിക്കൊണ്ടിരിക്കുന്ന സ്കൂട്ടറിൽ റീൽസ് ചെയ്ത വധുവിനെതിരെ നടപടിയെടുത്ത് ഡൽഹി പോലീസ്. ഹെൽമെറ്റ് വയ്ക്കാതെ സ്കൂട്ടർ ഓടിച്ചതിന് 1000 രൂപയും ഡ്രൈവിംഗ് ലൈസൻസ് ഇല്ലാത്തതിന് 5000 രൂപയും ഡൽഹി പോലീസ് പിഴ ചുമത്തി. വിവാഹ വേഷത്തിൽ സ്കൂട്ടറോടിച്ചുകൊണ്ട് ‘സജ്നാ ജി വാരി വാരി’ എന്ന ഗാനത്തിനാണ് വധു റീൽസ് ചെയ്തത്. ഇൻസ്റ്റഗ്രാമിൽ പങ്കുവച്ച ഈ റീൽ നിമിഷം നേരം കൊണ്ട് തന്നെ വൈറലായി മാറിയിരുന്നു.
ഇനി ഇത്തരത്തിലുള്ള ബുദ്ധിമോശം കാണിക്കരുതെന്ന താക്കീതോടെ യുവതിയുടെ സ്കൂട്ടറിലെ അഭ്യാസ പ്രകടനവും പിന്നാലെ പിഴ രസീതിന്റെ ചിത്രവുമടങ്ങുന്ന വീഡിയോ ഡൽഹി പോലീസ് തന്നെ ട്വിറ്ററിൽ പങ്കുവെച്ചു.
https://twitter.com/DelhiPolice/status/1667542114199306242?s=20
അതേസമയം ഈ സംഭവത്തിൽ ഡൽഹി പോലീസിനെ അനുമോദിച്ചും പിന്തുണച്ചും കൊണ്ട് ട്വിറ്ററിൽ നിരവധിപേരാണ് രംഗത്ത് വന്നിരിക്കുന്നത്. ജീവനെടുക്കുന്ന ഇത്തരം സാഹസിക പ്രകടനങ്ങൾക്കെതിരെ ഡൽഹി പോലീസ് സ്വീകരിച്ച നടപടി മാതൃകാപരവും സ്വാഗതാർഹവുമാണെന്ന് ട്വിറ്റർ ഉപയോക്താക്കൾ പറയുന്നു.
