മലയാളികളുടെ പ്രിയപ്പെട്ട നടന്മാരിലൊരാളാണ് ഹരീഷ് പേരടി. ചെറിയ കാലയളവിൽ തന്നെ നല്ല നടൻ എന്ന ഖ്യാദി ഹരീഷ് പേരടിക്ക് മലയാള സിനിമാ പ്രേമികൾ നൽകിയിരുന്നു. മലയാളത്തിൽ മാത്രമല്ല തമിഴ് സിനിമാ ലോകത്തും നിറസാന്നിധ്യമാണ് താരം. ആരാധകർ ഏറെ കാത്തിരിക്കുന്ന ലിജോ ജോസ് പെല്ലിശ്ശേരി-മോഹൻലാൽ ചിത്രമായ മലൈക്കോട്ടൈ വാലബനിൽ ഒരു പ്രധാന വേഷവും ഹരീഷ് ചെയ്യുന്നുണ്ട്. ബിഗ് ബജറ്റിലൊരുങ്ങുന്ന ചിത്രത്തിന്റെ ഷൂട്ടിംഗ് തിരക്കിലായിരുന്നു താരം. ഇപ്പോഴിതാ, മോഹൻലാലും ഒന്നിച്ചുള്ള അവസാന ഷോട്ടും പൂർത്തിയായതിന്റെ സന്തോഷം പങ്കുവെയ്‌ക്കുകയാണ് ഹരീഷ് പേരടി.
‘ആറ് മാസമായി അഭിനയകലയുടെ ഈ ഉസ്താദിനൊടൊപ്പം എനിക്ക് പരിചയമില്ലാത്ത ഏതോ ഭൂമികയിലൂടെ, ഏതോ കാലത്തിലൂടെയുള്ള ഒരു യാത്രയായിരുന്നു. ഇന്ന് ഈ സിനിമയുടെ ഞങ്ങളൊന്നിച്ചുള്ള അവസാന ഷോട്ട് കഴിഞ്ഞ് ക്യാമറ കൺ ചിമ്മിയപ്പോൾ, ഈ നടന വാലിഭന്റെ ആലിംഗനം എന്റെ അഭിനയ ജീവിതത്തിലെ നിറമുള്ള ഒരു ഏടാണ്. ഞങ്ങളുടെ കഥാപാത്രങ്ങളെയും ഞങ്ങളിലെ അഭിനേതാക്കളെയും ഞങ്ങൾ എന്ന മനുഷ്യരെയും ഒന്നും വേർതിരിക്കാൻ പറ്റാതെയുള്ള രണ്ട് ശരീരങ്ങളുടെ പരസ്പ്പര ബഹുമാനത്തിന്റെ സ്നേഹ മുഹൂർത്തം.ലാലേട്ടാ…’- എന്നാണ് ഹരീഷ് പേരടി ഫേയ്സ്ബുക്കിൽ കുറിച്ചിരിക്കുന്നു. മോഹൻലാലിനെ പൊന്നാട അണിയിക്കുന്ന ചിത്രവും താരം പങ്കുവെച്ചിട്ടുണ്ട്.
ലിജോയുടെ മറ്റെല്ലാ ചിത്രങ്ങളിൽ നിന്നും വ്യത്യസ്തമായ ഒരു ഹൈപവർ മാസ് എന്റർടെയിനർ ആയിരിക്കും വാലിബൻ എന്നാണ് റിപ്പോർട്ടുകൾ. ഫസ്റ്റ് ലുക്ക് പോസ്റ്ററിലൂടെ തന്നെ ഒരു സൂചന അണിയറ പ്രവർത്തകർ നൽകിയിരുന്നു. മോഹൻലാലിന്റെ വ്യത്യസ്തമായ ഒരു കഥാപാത്രവും പെർഫോർമൻസുമായിരിക്കും ചിത്രത്തിൽ. സിനിമയുടെ ഒരു ടീസറും പുറത്തുവിട്ടിരുന്നു. മണികണ്ഠൻ രാജൻ, ബംഗാളി നടി സൊണാലി കുൽക്കണി, ഡാനിഷ് സെയ്‌ത്ത് തുടങ്ങി വലിയ ഒരു താരനിര തന്നെ ചിത്രത്തിന്റെ ഭാഗമാകുന്നുണ്ട്.
