ബോളിവുഡ് താരം സുശാന്ത് സിങ് രജ്പുതിന്റെ മരണം ആരാധകർക്കും പ്രിയപ്പെട്ടവർക്കും ഇപ്പോഴും ഉൾക്കൊള്ളാനായിട്ടില്ല. സുശാന്തിന്റെ ഓർമകൾക്ക് ഇന്ന് മൂന്ന് വയസ്സ് തികയുമ്പോൾ, അദ്ദേഹത്തെ അനുസ്മരിക്കുന്ന വീഡിയോകളും ചിത്രങ്ങളും സോഷ്യൽ മീഡിയയിൽ നിറയുകയാണ്. നടന്റെ കാമുകിയായിരുന്ന റിയ ചക്രബർത്തിയുടെ പോസ്റ്റാണ് ഇപ്പോൾ സോഷ്യൽ മീഡിയിൽ ശ്രദ്ധനേടുന്നത്.
സുശാന്തിന്റെ കാമുകിയായിരുന്ന റിയ ചക്രബർത്തി സുശാന്തിനൊപ്പമുള്ള ഒരു അപൂർവ വീഡിയോയാണ് പങ്കുവെച്ചത്. ഇരുവരും അവധിക്കാലം ആഘോഷിക്കുന്നതിന്റെ വീഡിയോയായിരുന്നു പങ്കുവെച്ചത്. ചില ചിത്രങ്ങൾ റിയ പങ്കുവെച്ചു. ഇൻഫിനിറ്റി+1 എന്നായിരുന്നു റിയ ചിത്രങ്ങൾക്ക് ക്യാപ്ഷൻ നൽകിയിരുന്നത്. എന്നാൽ വീഡിയോയ്ക്ക് താഴെ നിരവധി വിമർശനങ്ങളാണ് ഉയരുന്നത്.
സുശാന്തിന്റെ സഹോദരി ശ്വേതയും ഓർമ്മ കുറിപ്പ് പങ്കുവെച്ചു. ലവ് യൂ ഭായ്… നിന്റെ ബുദ്ധിക്ക് സല്യൂട്ട്. ഓരോ നിമിഷവും ഞാൻ നിന്നെ മിസ് ചെയ്യുന്നുണ്ട്. പക്ഷേ എനിക്കറിയാം നീ ഇപ്പോൾ എന്റെ ഭാഗമാണെന്ന്… എന്റെ ശ്വാസം പോലെ ഒരു അവിഭാജ്യ ഘടകമായി നീ മാറിയിരിക്കുന്നു എന്നായിരുന്നു ശ്വേതയുടെ കുറിപ്പ്.
താരത്തിന്റെ ഓർമ്മ ദിനത്തിൽ കുറിപ്പുമായി സാറ അലിഖാനും എത്തി. ആദ്യമായിട്ടായിരുന്നു ഞങ്ങൾ കേദാർനാഥിലേക്ക് പോയത്. എന്റെ ആദ്യത്തെ ഷൂട്ടിങ് യാത്രയും അതായിരുന്നു. ഇനി അങ്ങനെയൊന്ന് ഉണ്ടാകില്ലെന്ന് എനിക്കറിയാം. പക്ഷേ ആക്ഷൻ, കട്ട്, സൂര്യോദയം, നദികൾ, മേഘങ്ങൾ, നിലാവ്, കേദാർനാഥ് എന്നിവയ്ക്കിടയിൽ എവിടെയോ നീ ഉണ്ടെന്ന് എനിക്കറിയാം. ഞങ്ങളുടെ നക്ഷത്രങ്ങൾക്കിടയിൽ ഇനിയും തിളങ്ങുക. എന്നായിരുന്നു സാറയുടെ കുറിപ്പ്. സുശാന്തിനൊപ്പമുള്ള ചിത്രങ്ങളും സാറ പങ്കുവെച്ചു.
2020 -ൽ ആയിരുന്നു സുശാന്തിന്റെ വിയോഗം. മുംബൈയിലെ ബാന്ദ്രയിലുള്ള ഫ്ലാറ്റിനുള്ളിൽ തൂങ്ങിമരിച്ച നിലയിലായിരുന്നു താരത്തെ കണ്ടെത്തിയത്. തുടർന്ന് ബോളിവുഡിൽ വലിയ വിവാദങ്ങളും ചർച്ചകളുമെല്ലാം ഉരുത്തിരിഞ്ഞിരുന്നു. പലരും ആരാധകരുടെ രൂക്ഷവിമർശനങ്ങൾ നേരിടേണ്ടി വന്നു.
