ന്യൂഡൽഹി: ബിപോർജോയ് അതിതീവ്ര ചുഴലിക്കാറ്റായി മാറിയതിന്റെ പശ്ചാത്തലത്തിൽ ജൂൺ 15-ന് തീരത്തോട് അടുത്ത് കൊണ്ടിരിക്കുകയാണ്. ബഹിരാകാശ നിലയത്തിലുള്ള യുഎഇയുടെ ബഹിരാകാശ സഞ്ചാരി സുല്ത്താന് അല് നെയാദി കഴിഞ്ഞദിവസം നിലയത്തില് നിന്ന് പകർത്തിയ ബിപോർജോയ് ചുഴലിക്കാറ്റിന്റെ ചിത്രങ്ങൾ പുറത്ത് വിട്ടു. ട്വിറ്ററിലൂടെയായിരുന്നു ദൃശ്യങ്ങൾ പുറത്ത് വിട്ടത്.
അറബിക്കടലിൽ ചുഴലിക്കാറ്റ് രൂപപ്പെടുന്നതിന് രണ്ട് ദിവസം മുമ്പ് പകർത്തിയ ചിത്രങ്ങളും വീഡിയോകളുമാണ് ട്വീറ്റ് ചെയ്തിരിക്കുന്നത്. ബഹിരാകാശ നിലയത്തില് ഏറ്റവും കൂടുതല് സമയം ചിലവഴിക്കുകയും ബഹിരാകാശ നടത്തത്തിനിറങ്ങുകയും ചെയ്ത ആദ്യ അറബ് ബഹിരാകാശ സഞ്ചാരിയാണ് നെയാദി.
മണിക്കൂറില് 125 -135 കിലോമീറ്ററില് വീശുന്ന കാറ്റ് 150 കിലോമീറ്റര്വരെ വേഗം കൈവരിക്കാനാണ് സാധ്യത. ഗുജറാത്തില് കനത്ത കാറ്റിനും മഴയ്ക്കും സാധ്യതയുണ്ടെന്ന് കാലാവസ്ഥാ കേന്ദ്രം അറിയിച്ചു. വ്യാഴാഴ്ച രാവിലെ മുതല് സൗരാഷ്ട്ര-കച്ച് മേഖലയില് പല ജില്ലകളിലും ശക്തമായ കാറ്റും മഴയും അനുഭവപ്പെടുന്നുണ്ട്.
