യുവാക്കളിലെ ഹൃദയാഘാതമാണ് ഇന്ന് ലോകം ആശങ്കയോടെ ഉറ്റുനോക്കുന്ന ആരോഗ്യപ്രശ്നങ്ങളില് ഒന്ന്. മുന്പെല്ലാം പ്രായമായവരെ ബാധിക്കുന്ന രോഗമായിട്ടാണ് ഹൃദയാഘാതത്തെ കണ്ടിരുന്നതെങ്കില് ഇപ്പോള് ആര്ക്കും എപ്പോള് വേണമെങ്കിലും ഹൃദയസ്തംഭനം ഉണ്ടാകാമെന്ന അവസ്ഥയാണ് .
എന്നാല് പെട്ടെന്നൊരു നിമിഷത്തില് സംഭവിക്കുന്നതുമല്ല ഇത്. ഹൃദയത്തിന്റെ പ്രവര്ത്തനം തകരാറിലാകുന്നത് സംബന്ധിച്ച് ചില സൂചനകള് ശരീരം നമുക്ക് തന്നു കൊണ്ടേയിരിക്കും. നാം അവ പലപ്പോഴും അവഗണിക്കുന്നതാണ് പെട്ടെന്നൊരു ദിവസം ഹൃദയാഘാതവും പക്ഷാഘാതവുമൊക്കെ ഉണ്ടാകാന് കാരണമാകുന്നത്. ഹൃദയാഘാതത്തിന്റെ ചില ലക്ഷണങ്ങള് കണ്ണുകളില് നോക്കിയും കണ്ടെത്താന് സാധിക്കും.അവ ഏതെല്ലാമാണെന്ന് പരിശോധിക്കാം.
കാഴ്ച ശക്തിയെ പൂര്ണമായോ ഭാഗികമായോ ബാധിക്കാന് ഹൃദ്രോഗം കാരണമാകാം. അമൗരോസിസ് ഫ്യൂഗക്സ് എന്നാണ് ഈ താത്ക്കാലിക കാഴ്ച നഷ്ടത്തിന് പേര്. മുപ്പത് മിനിറ്റോ അതിലധികമോ ഇത് നീണ്ടു നിന്നേക്കാം. റെറ്റീനയുടെ കേന്ദ്രഭാഗമായ മക്യൂളയ്ക്ക് താഴെ മഞ്ഞ നിറത്തിലുള്ള കൊഴുപ്പിന്റെ നിക്ഷേപങ്ങള് കാണപ്പെടും.
ഹൃദ്രോഗത്തെ തുടര്ന്ന് ചെറിയ മാറ്റങ്ങള് കാഴ്ചശക്തിയിലും ഉണ്ടാകാം. കണ്ണിലെ കോര്ണിയ്ക്ക് ചുറ്റും അര്കസ് സെനിലിസ് എന്ന വലയവും ഹൃദയാഘാതത്തിന് മുന്പ് കാണപ്പെടാം . റെറ്റിനയുടെ നിറത്തില് പെട്ടെന്ന് വരുന്ന വിശദീകരിക്കാനാവാത്ത നിറം മാറ്റവും വരാനിരിക്കുന്ന ഹൃദയാഘാതത്തിനുള്ള മുന്നറിയിപ്പാണ്.കണ്ണിന് താഴെയുള്ള ചര്മത്തില് മഞ്ഞ നിറത്തിലുള്ള നിക്ഷേപങ്ങള് ശ്രദ്ധയില്പ്പെട്ടാലും സൂക്ഷിക്കണം. പല രോഗലക്ഷണങ്ങളും അവഗണിക്കാനും ഇന്റര്നെറ്റില് നോക്കി മരുന്നുകള് കണ്ടെത്തി സ്വയം ചികിത്സ നടത്താനുമുള്ള ത്വര ഇന്ന് പലര്ക്കുമുണ്ട്. തെറ്റായ മരുന്നുകളും തെറ്റായ ഡോസുമൊക്കെ ഗുണത്തിന് പകരം ദോഷമാണ് ഉണ്ടാക്കുക. ഇവയും ശരീരത്തിന് ഹാനികരമാണ്.
