സമൂഹമാദ്ധ്യമങ്ങളിൽ ഇപ്പോൾ വൈറലാകുന്ന ഒരു ചിത്രമാണിത്. ഡാൻസ് വേഷത്തിൽ ചിരി തൂകിയിരിക്കുന്ന ഒരു സുന്ദരിക്കുട്ടിയുടെ ബ്ലാക്ക് ആന്റ് വൈറ്റ് ഫോട്ടോ. ഈ സുന്ദിക്കുട്ടിയെ മനസ്സിലായോ എന്ന ക്യാപ്ഷനോടുകൂടിയാണ് ചിത്രം വൈറലാകുന്നത്. എന്നാൽ ആ ചിരിയിൽ സൂക്ഷിച്ചൊന്ന് നോക്കിയാൽ തന്നെ അത് ആരാണെന്ന് തിരിച്ചറിയാൻ സാധിക്കും. ചിത്രത്തിലുള്ളത് മറ്റാരുമല്ല, നടനും നർത്തകനുമായ വിനീതിന്റെ കുട്ടിക്കാലചിത്രമാണ്.
താരം ഒരു നൃത്തതിന് ശേഷമോ മുൻപോ ഉള്ള ചിത്രമാണത്. മലയാളികൾക്ക് ഏറെ പ്രിയങ്കരനായ വിനീത് അഭിനയത്തിനൊപ്പം നൃത്തവും ഒരുപോലെ മുന്നോട്ടു കൊണ്ടുപോവുന്ന നടനാണ്. മലയാളം കൂടാതെ തമിഴ്, തെലുഗു, കന്നഡ, ഹിന്ദി എന്നീ ഭാഷാചിത്രങ്ങളിലും താരം അഭിനയിച്ചിട്ടുണ്ട്.
മലയാളികളുടെ പ്രിയപ്പെട്ട നടിയുമായ ശോഭനയുടെ ബന്ധു കൂടിയാണ് വിനീത്. സ്കൂൾ കാലം മുതൽ തന്നെ ഭരതനാട്യത്തിൽ താരം ശ്രദ്ധകൊടുത്തിരുന്നു. അതിനാൽ ധാരാളം സമ്മാനങ്ങൾ വിനീതിന് ലഭിച്ചിട്ടുണ്ട്. സംസ്ഥാന സ്കൂൾ യുവജനോത്സവത്തിൽ ഭരതനാട്യ മത്സരത്തിൽ തുടർച്ചയായ നാലുതവണ ഒന്നാം സ്ഥാനത്തിന് അർഹനായിട്ടുണ്ട്. കൂടാതെ കലാപ്രതിഭ പട്ടവും വിനീതിന് ലഭിച്ചിട്ടുണ്ട്.
1985ൽ ഐവി ശശിയുടെ ‘ഇടനിലങ്ങൾ’ എന്ന ചിത്രത്തിലൂടെ പതിനാറാം വയസ്സിലാണ് വിനീത് അഭിനയരംഗത്തേക്കെത്തുന്നത്. പിന്നീട് നായകനായും സഹതാരമായും വില്ലനായുമെല്ലാം നിരവധി വേഷങ്ങളിൽ വിനീത് വേഷപ്പകർച്ച നടത്തി. 1986-ൽ പുറത്തിറങ്ങിയ നഖക്ഷതങ്ങൾ എന്ന ചിത്രത്തിലൂടെയാണ് ഏറെ ശ്രദ്ധിക്കപ്പെട്ടത്.
താരത്തിന്റേതായി അവസാനമായി ഇറങ്ങിയ സിനിമ പാച്ചുവും അത്ഭുതവിളക്കുമാണ്. വിനീത് ഒരിടവേളയ്‌ക്ക് ശേഷം അഭിനയിച്ച ചിത്രത്തിലെ റിയാസ് എന്ന കഥാ പാത്രം ഏറെ പ്രേക്ഷക പ്രശംസ നേടിയിരുന്നു.
