മലയാളിയ്ക്ക് ചായ ഇല്ലാതെ ഒരുദിനം സ്വപ്നം കാണാൻ പോലും കഴിയില്ല. എത്ര ചൂടുള്ള ദിവസമാണെങ്കിലും ചൂട് ചായ നിർബന്ധമാണ്. നല്ല ചൂട് ചായ ആണെങ്കിലും ചിലർക്ക് ഊതി കുടിക്കുന്നതാണ് പതിവ്. ഇത്തരത്തിൽ ചൂട് ചായ കുടിക്കുന്നവർ ഒന്ന് സൂക്ഷിക്കുന്നത് നല്ലതായിരിക്കുമെന്നാണ് പഠനങ്ങൾ വ്യക്തമാക്കുന്നത്.
അമിതമായി ചൂട് ചായ കുടിക്കുന്നത് ഉദരത്തിലെ കോശങ്ങളെ ബാധിക്കുമെന്നാണ് പഠനങ്ങൾ പറയുന്നത്. വയറിനകത്തെ ഗ്യാസിട്രിക് രസത്തെ ഇത് ലയിപ്പിക്കുകയും ഇതുവഴി ദഹനപ്രക്രിയയെ ദോഷകരമായി ബാധിക്കുകയും ചെയ്യുന്നു. ചൂടുള്ള ചായ കുടിക്കുന്നത് നാവിലെ രസമുകുളങ്ങളെ ബാധിക്കാനും സാധ്യതയേറെയാണ്. ചുണ്ട് കറുക്കുന്നതിനും ചൂട് ചായ കാരണമാകും.
മദ്യം കഴിക്കുന്നവരുടെ വില്ലനാണ് ചായ. മദ്യം സ്ഥിരമായി കഴിക്കുന്നവരാണെങ്കിൽ ചൂട് ചായ ഊതി കുടിക്കുന്നത് ഒഴിവാക്കുന്നതാകും നല്ലത്. ചൂട് ചായ ഊതി കുടിക്കുന്നത് അർബുദം വരാനുള്ള സാദ്ധ്യത വർദ്ധിപ്പിക്കും. ആഴ്ചയിൽ ഒരു തവണ ചായ കുടിക്കുന്നവരെ അപേക്ഷിച്ച് ദിവസേന മദ്യവും തിളച്ച ചായും കുടിക്കുന്നവരിൽ അന്നനാളത്തിൽ ക്യാൻസർ വരാനുള്ള സാധ്യത അഞ്ച് മടങ്ങ് കൂടുതലായിരിക്കും. ചൈനയിൽ നടത്തിയ പഠനത്തിലാണ് ഇക്കാര്യം വ്യക്തമാക്കുന്നത്. പുകവലിക്കുന്നവരിലും ചൂടൻ ചായ വിപരീത ഫലമാണ് നൽകുക. പുകവലിക്കുന്നവർ ദിവസവും തിളച്ച ചായ കുടിക്കുകയാണെങ്കിൽ അർബുദ സാദ്ധ്യത രണ്ട് മടങ്ങ് കൂടുമെന്നും പഠനത്തിൽ പറയുന്നു.
ക്ഷീണം വരുമ്പോൾ ഉന്മേഷത്തിന് കുടിക്കുന്ന ചായ എട്ടിന്റെ പണി തരുമെന്ന ആവലാതിയിലാണോ, എന്നാൽ പരിഹാരമുണ്ട്. 60 ഡിഗ്രി സെൽഷ്യസിൽ കൂടുതലുള്ള ചായ കുടിക്കുന്നതാണ് കൂടുതൽ അപകടം. ചായ എടുത്ത് നാലഞ്ച് മിനിറ്റ് ശേഷം അത് ചെറുതായി തണുത്ത് തുടങ്ങുമ്പോൾ കുടിക്കുന്നത് വലിയ ആരോഗ്യപ്രശ്നങ്ങൾ ഉണ്ടാക്കില്ലെന്നും പഠനത്തിൽ പറയുന്നു. ചായ മാത്രമല്ല കാപ്പിയും ഇതേ രീതിയിൽ അപകടം സൃഷ്ടിക്കുന്നുണ്ട്.
