യോഗയെ ജനകീയമാക്കിയതിലും ദേശീയ നയത്തിന്റെ ഭാഗമാക്കുന്നതിലും പ്രധാന പങ്കുവഹിച്ചത് ജവഹർലാൽ നെഹ്റുവാണെന്ന് കോൺഗ്രസ്. അന്താരാഷ്ട്ര യോഗാ ദിനത്തോട് അനുബന്ധിച്ച് കോൺഗ്രസിന്റെ ഔദ്യോഗിക ട്വിറ്റർ ഹാൻഡിലുടെയായിരുന്നു കുറിപ്പ് പങ്കുവെച്ചത്. കുറിപ്പിനൊപ്പം നെഹ്റു ശിർഷാസനം ചെയ്യുന്ന ചിത്രവും പങ്കുവെച്ചിട്ടുണ്ട്.
നമ്മുടെ ശാരീരികവും മാനസികവുമായ ക്ഷേമത്തിനായി ആചരിക്കുന്ന പുരാതനമായ വിദ്യയുടെയും തത്ത്വചിന്തയുടെയും പ്രാധാന്യത്തെ നമുക്ക് അഭിനന്ദിക്കമെന്നും അതിനെ നമ്മുടെ ജീവിതത്തിൽ ഉൾപ്പെടുത്തണമെന്നും പോസ്റ്റിൽ കൂട്ടിച്ചേർത്തിട്ടുണ്ട്.
2014-ലെ യുൻ സന്ദർശനത്തിൽ പ്രധാനമന്ത്രി നടത്തിയ പ്രസംഗത്തിലാണ് യോഗ ആഗോള തലത്തിൽ ആചരിക്കാൻ മോദി ആഹ്വാനം ചെയ്യുന്നത്. ഭാരതം ലോകത്തിന് സമ്മാനിച്ച വിലപ്പെട്ട സംഭാവനയാണ് യോഗ. ലോകത്തിന്റെ മുഴുവൻ സമാധാനത്തിനും ഐക്യത്തിനും യോഗ ഉതകുമെന്നതായിരുന്നു അന്ന് യോഗദിനത്തിനായി ആഹ്വാനം ചെയ്തുകൊണ്ട് പ്രധാനമന്ത്രി പറഞ്ഞത്. ഇന്ന് ലോകം മുഴുവൻ അതേറ്റെടുത്തു. അന്താരഷ്ട്ര തലത്തിൽ ഇന്ന് യോഗ മാനിക്കപ്പെടുന്നു.
