വിഷമവും ചുറ്റുപാടും മറന്ന് മനസിൽ ആനന്ദം നിറയ്ക്കാൻ സഹായിക്കുന്ന ഒരു മാന്ത്രികവിദ്യയാണ് സംഗീതം. മാനസികമായും ശാരീരികമായും സുഖം പ്രാപിക്കുന്നതിന് സംഗീതം നമ്മെ സഹായിക്കുമെന്ന് പറഞ്ഞാൽ വിശ്വസിക്കാൻ സാധിക്കുമോ… എന്നാൽ അതാണ് സത്യം. പാട്ട് കേൾക്കുന്നത് മനസിനെയും ശരീരത്തിനെയും ഒരുപോലെ മെച്ചപ്പെടുത്തും. വൈകാരികമായി പിന്നിലോട്ട് നിൽക്കുന്ന നമ്മെ സുഖപ്പെടുത്താനുള്ള ഒരു ഉപകരണമായാണ് സംഗീതം പ്രവർത്തിക്കുന്നത്.
സന്തോഷം വന്നാലും സങ്കടം വന്നാലും പാട്ട് കേൾക്കുന്നത് പലരുടെയും ശീലമാണ്. അങ്ങനെ പാട്ട് ആസ്വദിക്കുന്നതിലൂടെ മനസികാരോഗ്യം മെച്ചപ്പെടുന്നു. ഒരു വ്യക്തിയുടെ മാനസിക പിരിമുറുക്കം കുറയ്ക്കാനും മനോനില മെച്ചപ്പെടുത്താനും മ്യൂസിക് തെറപ്പിയിലൂടെ സാധിക്കും.
ഒരുപാട് ചിരിച്ചാൽ ആയുസ്സ് കൂടും എന്ന് പറയുന്നത് വെറുതെയല്ല. ചിരിച്ചാൽ ശരീരത്തിൽ സന്തോഷ ഹോർമോണുകൾ വർദ്ധിക്കുന്നു. അത് തന്നെയാണ് മ്യൂസിക് തെറാപ്പിയിലും നടക്കുന്നത്. പാട്ട് കേൾക്കുമ്പോൾ സന്തോഷ ഹോർമോണുകളായ എൻഡോർഫിൻ ശരീരം ഉൽപാദിപ്പിക്കുന്നു. ഇതാണ് സ്ട്രെസ് കുറയ്ക്കുന്നത്. വൈകാരികമായ മനസിന്റെ മുറിവുകൾ ഉണക്കാൻ ചികിത്സയിൽ സംഗീതം ഉപയോഗിക്കുന്നതും ഇതു കൊണ്ടാണ്.
ഉത്കണ്ഠ, വിഷാദം, എഡിഎച്ച്ഡി എന്നീ മാനസിക രോഗങ്ങൾ പാടെ ഇല്ലാതാക്കാനും പാട്ട് കേൾക്കുന്നതിലൂടെ സഹായകമാകും. തികച്ചും ഒരു ചികിത്സാരീതിയെന്ന് തന്നെ ഇതിനെ വിശേഷിപ്പിക്കാം. രോഗം ബാധിച്ച് ചികിത്സയിൽ കഴിയുന്നവർക്ക് മാനസിക ഉത്സാഹത്തിനും സമാധാനത്തിനും വേണ്ടി ആശുപത്രികളിൽ പാട്ടുകൾ വെയ്ക്കാറുണ്ട്. ഇതിലൂടെ രോഗിയുടെ മനോനില മെച്ചപ്പെടുന്നതായിരിക്കും.
വാക്കുകൾ പരാജയപ്പെടുന്നിടത്ത് സംഗീതം സംസാരിക്കുന്നു. സംഗീതം സാർവത്രിക ഭാഷയാണ്. ആശയ വിനിമയത്തിനുള്ള ഒരു ഉപാധിയായി സംഗീതത്തെ കാണാം. വരികൾ കൊണ്ടും, ഈണങ്ങൾ കൊണ്ടും, വാക്കുകൾ കൊണ്ടും അർത്ഥവത്തായ കഥ മെനയാനും അത് മറ്റുള്ളവരിൽ ആനന്ദം ജനിപ്പിക്കുന്നതിനും സംഗീതം സഹായിക്കുന്നു.
പാട്ട് കേൾക്കുന്നതിലൂടെ തലച്ചോറിലെ സെറാടോണിന്റെ അളവ് വർദ്ധിക്കും. ചിലയിനം സംഗീതം ഓർമ്മശക്തി മെച്ചപ്പെടുത്തുമെന്ന് പഠനങ്ങൾ പറയുന്നു. പാട്ടിന്റെ താളത്തിനനുസരിച്ച് ശ്വസനഗതി, ഹൃദയമിടിപ്പിന്റെ നിരക്ക്, രക്തസമ്മർദം ഇവയ്ക്കെല്ലാം വ്യത്യാസം വരും. കൂടാതെ വ്യായാമം ചെയ്യുമ്പോൾ പാട്ട് കേൾക്കുകയാണെങ്കിൽ ഫലപ്രദമായ റിസൾട്ട് ലഭിക്കും.
