തിരുവനന്തപുരം: നികുതി വെട്ടിപ്പുമായി ബന്ധപ്പെട്ട് പ്രമുഖ മലയാളി യൂട്യൂബർമാരുടെ വീടുകളിലും ഓഫീസുകളിലും ആദായ നികുതി വകുപ്പിന്റെ റെയ്ഡ് നടക്കുന്നു എന്ന് വാർത്തകൾ വന്നിരുന്നു. നടിയും അവതാരകയുമായ പേർളി മാണി, സെബിൻ, സജു മുഹമ്മദ്, സുജിത്ത് ഭക്തൻ അടക്കമുള്ള പത്തോളം യൂട്യൂബർമാരുടെ വീടുകളിലാണ് ആദായനികുതി വകുപ്പ് അന്വേഷണം നടത്തുന്നത് എന്നാണ് പുറത്തുവന്ന വാർത്തകൾ. ഇപ്പോഴിതാ, തന്റെ വീട്ടിൽ റെയ്ഡ് നടന്നിട്ടില്ല എന്ന് വ്യക്തമാക്കി രംഗത്തു വന്നിരിക്കുകയാണ് സുജിത്ത് ഭക്തൻ.
‘റെയിഡ് സംബന്ധമായ വാർത്തകൾ ടിവിയിൽ കണ്ടു. എന്റെ വീട്ടിൽ ഇതുവരെ റെയ്ഡ് ഒന്നും വന്നിട്ടില്ല. കഴിഞ്ഞ 5 കൊല്ലമായി കൃത്യമായി ഇൻകം ടാക്സും ജിഎസ്ടി-യും എല്ലാം അടക്കുന്നുണ്ട്. ഇനി വന്നാലും പൂർണ്ണ തോതിൽ സഹകരിക്കാൻ ഞാൻ ബാധ്യസ്ഥനുമാണ്. നിയമം എല്ലാവർക്കും ഒരുപോലെയാണ്’- എന്നാണ് സുജിത്ത് ഭക്തൻ ഫേയ്സ്ബുക്കിൽ കുറിച്ചത്. ഒരു വർഷം മുൻപ് ചെയ്ത ഒരു വീഡിയോയും സുജിത്ത് പങ്കുവെയ്ക്കുന്നു.
കേരളത്തിലെ പല യൂട്യൂബർമാരുടെയും വാർഷിക വരുമാനം രണ്ട് കോടി വരെയാണ്. 35 ലക്ഷത്തിലധികം വരും പലരുടെയും സബ്സ്ക്രൈബേഴ്സിന്റെ എണ്ണം. അത് കൊണ്ട് തന്നെ വലിയ വരുമാനവും ഇവർക്ക് ലഭിക്കുന്നുണ്ട്. എന്നാൽ ഇവർ വരുമാനം അനുസരിച്ച് നികുതി നൽകുന്നുണ്ടോയെന്ന സംശയം ആദായനികുതി വകുപ്പിനുണ്ട്. ഇതിന്റെ അടിസ്ഥാനത്തിലാണ് ആദായ നികുതി വകുപ്പിന്റെ പരിശോധന നടക്കുന്നത്.
