പ്രദീപ് ശാംഭവി
ശ്രീ സുബ്രഹ്മണ്യ ഭഗവാനുമായി ബന്ധപ്പെട്ട രണ്ട് പ്രധാന ദിവസങ്ങളാണ് ആഷാഢമാസത്തിലെ നാളെ തിഥി ഉൾപ്പെടുന്ന സ്കന്ദപഞ്ചമിയും, അടുത്ത ദിവസത്തെ തിഥി ഉൾപ്പെടുന്ന കുമാരഷഷ്ഠിയും.
ചന്ദനഷഷ്ഠിയും ,കപിലാഷഷ്ഠിയും, വരുണഷഷ്ഠിയും, കുമാരഷഷ്ഠിയും, സ്കന്ദഷഷ്ഠിയും, കൃഷ്ണഷഷ്ഠിയും, ലളിതാഷഷ്ഠിയും… ഇപ്രകാരം ഓരോ മാസങ്ങളിലേയും ഷഷ്ഠിവൃതങ്ങൾക്ക് പ്രത്യേകം പ്രത്യേകം പേരുകളുണ്ട്.
സ്കന്ദപഞ്ചമിയിൽ ശക്തിയ്ക്കു പ്രാധാന്യം നൽകുന്നതാവണം അനുഷ്ഠാനങ്ങളും പൂജകളും .എന്നാൽ ആഷാഢപഞ്ചമിയിൽ വായുവിനെയാണ് ഒപ്പം പ്രത്യേകം പൂജിക്കേണ്ടത്. ഗ്രാമത്തിന്റെ പുറത്ത് ഒരു പർവതത്തിന്റെ മുകളിലാണ് ചടങ്ങുകൾ നടത്തേണ്ടത്. വായുവിന്റെ പരീക്ഷണം നടത്തി ഓരോ യാമങ്ങളിൽ ഓരോ ഭാഗങ്ങളിലും ഏതേതു വായുക്കളാണ് സഞ്ചരിക്കുന്നത് എന്ന് മനസ്സിലാക്കി അതാത് ദേവന്മാർക്ക് പൂജ നൽകണം. അന്നേ ദിവസം നിരാഹാരനായി കഴിഞ്ഞ് വൈകുന്നേരം വീട്ടിൽ വന്നു കുറച്ചു ഭക്ഷണം കഴിച്ച് നിലത്ത് കിടന്നുറങ്ങണം. രാത്രിയുടെ നാലാമത്തെ യാമത്തിൽ എന്ത് സ്വപ്നമാണ് കാണുന്നത് അത് പിന്നീട് സംഭവിക്കും എന്നാണ് പറയപ്പെടുന്നത്. എന്നാൽ നല്ലകാര്യങ്ങളല്ല കാണുന്നതെങ്കിൽ ശിവപൂജ ചെയ്തു എട്ട് യാമങ്ങൾ ഉപവസിക്കണം.
ആഷാഢത്തിൽ അറിയപ്പെടുന്ന ഏറ്റവും പ്രധാനപ്പെട്ട വ്രതം സ്കന്ദവൃതം ആണ് . ഇതാണ് ആഷാഢത്തിലെ കുമാര ഷഷ്ഠി. സുബ്രഹ്മണ്യനെ പൂജിച്ച് ശിവന്റെയും ഉമയുടെയും അനുഗ്രഹം അന്നേ ദിവസം നേടുവാൻ കഴിയും .സന്തതി പരമ്പരകൾക്ക് അതുകൊണ്ടുള്ള ഗുണവും അനുഗ്രഹവും ലഭ്യമാകും.
കുമാരഷഷ്ഠിയിൽ ശിവപ്രാധാന്യമായിട്ടാണ് കുമാരന്റെ അനുഷ്ഠാനങ്ങളെല്ലാം. സുബ്രഹ്മണ്യനുമായി ബന്ധപ്പെട്ട അനുഷ്ഠാനങ്ങളിൽ രക്തചന്ദനമാലയാണ് പ്രാധാന്യം. എന്നാൽ രുദ്രാക്ഷമാലക്കും തുല്യപ്രാധാന്യം ഇന്നേ ദിവസങ്ങളിൽ പ്രത്യേകം കല്പിച്ചിട്ടുണ്ട്.
പാമ്പൻ സ്വാമികളുടെ കുമാരസ്തവം, സുബ്രഹ്മണ്യ ഭൂജംഗം എന്നീ സ്തോത്രങ്ങൾ ഈ ദിവസം ഭക്തിയോടെ ജപിക്കണം.
