അപൂർവ്വ നേട്ടങ്ങൾ സ്വന്തമാക്കുന്നവരെ അടയാളപ്പെടുത്തുന്ന ഒന്നാണ് ഗിന്നസ് വേൾഡ് റെക്കോർഡ്സ്. ഗിന്നസിൽ ഇടം നേടുന്നയാളുടെ സവിശേഷത മറ്റാർക്കുമുണ്ടാകാറില്ല. എന്നാൽ ഗിന്നസിൽ ഇടംപിടിക്കുന്നത് മനുഷ്യർ മാത്രമല്ലെന്ന് നിങ്ങൾക്കറിയാമോ? അപൂർവ്വം ചില സാഹചര്യങ്ങളിൽ മൃഗങ്ങളും ഗിന്നസ് റെക്കോർഡ് സ്വന്തമാക്കാറുണ്ട്. വളർത്തുമൃഗങ്ങളാണ് പലപ്പോഴും ഈ പട്ടികയിൽ ഇടം നേടിയിട്ടുള്ളത്. നായകൾ, പൂച്ചകൾ, തത്തകൾ, മുയലുകൾ, എന്തിനേറെ പറയുന്നു പന്നികൾ പോലും ലോക റെക്കോർഡ് നേടിയവയുടെ കൂട്ടത്തിലുണ്ട്. ഈ പട്ടികയിലേക്കാണ് ഒരു വളർത്തുപശുവും ഇടം പിടിച്ചിരിക്കുന്നത്.
ഗോസ്റ്റ് എന്ന പേരിലുള്ള വളർത്തുപശുവാണ് ഈ വൈറൽ താരം. അറുപത് സെക്കൻഡിനുള്ളിൽ വ്യത്യസ്തമായ പത്ത് വിദ്യകൾ കാണിച്ചാണ് ഗോസ്റ്റ് റെക്കോർഡ് സൃഷ്ടിച്ചത്. ഫിസ്റ്റ് ബംപ് ചെയ്യുക, ചുംബിക്കുക, ഹെഡ് നോഡ് എന്നിവയുൾപ്പെടെ പത്തെണ്ണമാണ് ഗോസ്റ്റിന്റെ പ്രകടനങ്ങൾ. യുഎസ്എയിലുള്ള മേഗൻ റെയ്മാൻ എന്നയാളുടെ വളർത്തുപശുവാണ് ഗോസ്റ്റ്. റെയ്മാൻ തന്നെയാണ് ഗോസ്റ്റിനെ ഈ വിദ്യകളെല്ലാം നിർദിഷ്ട സമയത്തിനുള്ളിൽ ചെയ്തുതീർക്കാൻ പഠിപ്പിച്ചതും. കന്നുകാലികൾ ചില്ലറക്കാരല്ലെന്ന് തെളിയിക്കുകയാണ് റെയ്മാന്റെ ‘ഗോസ്റ്റ്’.
