സാധാരണയായി താര വിവാഹങ്ങൾ ആഡംബരം കൊണ്ടായിരിക്കും പ്രശസ്തമാകുന്നത്. അല്ലെങ്കിൽ അതിഥികളെ കൊണ്ടും വാർത്തകളിൽ ഇടം പിടിക്കാറുണ്ട്. എന്നാൽ ബോളിവുഡ് താരം സണ്ണി ഡിയോൾ തന്റെ മകന്റെ വിവാഹ സത്കാരം സംഘടിപ്പിച്ചത് തികച്ചും വ്യത്യസ്തമായാണ്. ഹിമാചൽ പ്രദേശിലെ ദഷാലിലെ ഗ്രാമീണർക്കാണ് വിപുലമായ സദ്യ ഒരുക്കിയത്.
സണ്ണി ഡിയോളിന്റെ മകൻ കരൺ ഡിയോൾ ബാല്യകാല സുഹൃത്തായ ദൃഷ ആചാര്യയെയാണ്
വിവാഹം ചെയ്തത്. തുടർന്ന് വിവാഹ സത്കാരത്തിനായി കുടുംബം മണാലിയിലെ ദഷാൽ ഗ്രാമത്തിലെത്തുകയായിരുന്നു. പ്രാദേശിക ഭാഷയിൽ ഹിമാചലി ധാം എന്ന് വിളിക്കപ്പെടുന്ന ഗ്രാമവാസികൾക്ക് വിഭവ സമൃദ്ധമായ സദ്യയാണ് കുടുംബം ഒരുക്കിയത്. ഗുച്ചി കാ മദ്ര, സെപു വാദി, രാജ്മ, ദാൽ ചന, കാധി പക്കോറ, ഖട്ട കഡ്ഡു തുടങ്ങിയ വിഭവങ്ങൾ ഇതിൽ ഉൾപ്പെടുന്നു. ഹിമാലയത്തിന്റെ താഴ്വരയിൽ വളരുന്ന ലോകത്തിലെ ഏറ്റവും വിലകൂടിയ കൂണാണ് ഗുച്ചി.
ഗ്രാമവാസികൾക്കൊപ്പം പരമ്പരാഗത കുൽവി നൃത്തവും സണ്ണി അവതരിപ്പിച്ചു. സണ്ണി ഡിയോളിന് ഏറ്റവും ഇഷ്ടപ്പെട്ട ഇടമാണ് മണാലി. അതിനാൽ ഷൂട്ടിംഗ് ഇല്ലാത്തപ്പോൾ സണ്ണി സമയം ചെലവഴിക്കാൻ ഗ്രാമത്തിലെത്താറുണ്ട്. അവിടെ പ്രകൃതി മനോഹരമായ ഗ്രാമത്തിൽ ഒരു വീടും സ്ഥലവും സണ്ണി പാട്ടത്തിന് എടുത്തിട്ടുണ്ട്. ഈ ഗ്രാമത്തിലെ താമസക്കാർക്കായാണ് സണ്ണി വിരുന്ന് ഒരുക്കിയത്. ഗ്രാമത്തോടും താമസക്കാരോടും നന്ദി പറയുന്നതിനുള്ള മാർഗമായാണ് താൻ ഇതിനെ കാണുന്നതെന്ന് നടൻ പറയുന്നു.
Comments