സുരേഷ് ഗോപി ആരാധകർ ഏറെ കാത്തിരിക്കുന്ന ചിത്രമാണ് പ്രവീൺ നാരായണൻ തിരക്കഥയെഴുതി സംവിധാനം ചെയ്യുന്ന ‘ജെഎസ്കെ’. സുരേഷ് ഗോപി വക്കീൽ കുപ്പായം അണിയുന്നു എന്നതാണ് സിനിമയുടെ പ്രത്യേകത. ചിത്രത്തിന്റെ അപ്ഡേറ്റഷന് വേണ്ടിയുള്ള കാത്തിരിപ്പിലായിരുന്നു സിനിമാ പ്രേമികൾ. ഇപ്പോഴിതാ, താരത്തിന്റെ പിറന്നാൾ ദിനത്തിൽ സിനിമയുടെ ടീസർ പുറത്തു വിട്ടിരിക്കുകയാണ് അണിയറ പ്രവർത്തകർ. സുരേഷ് ഗോപിയുടെ മറ്റൊരു മാസ് അവതാരമായിരിക്കും ജാനകി vs സ്റ്റേറ്റ് ഓഫ് കേരളയിലെ കഥാപാത്രമെന്ന് ഉറപ്പ് നൽകുന്ന ടീസറാണ് പുറത്തു വന്നിരിക്കുന്നത്.
സുരേഷ് ഗോപിയ്ക്കൊപ്പം അനുപമ പരമേശ്വരനാണ് മറ്റൊരു കേന്ദ്ര കഥാപാത്രത്തെ അവതരിപ്പിക്കുന്നത്. സുരേഷ് ഗോപിയുടെ ഇളയമകൻ മാധവ് സുരേഷും സിനിമയിൽ അഭിനയിക്കുന്നുണ്ട്. ശ്രുതി രാമചന്ദൻ, ദിവ്യാ പിള്ള, അസ്കർ അലി, ബൈജു സന്തോഷ്, യദു കൃഷ്ണൻ, രജത് മേനോൻ, അഭിഷേക് രവീന്ദ്രൻ, കോട്ടയം രമേശ്, ജയൻ ചേർത്തല,നിസ്താർ സേട്ട്, ഷോബി തിലകൻ, ദിലീപ് മേനോൻ, വൈഷ്ണവി രാജ്, അപർണ, രതീഷ് കൃഷ്ണൻ, ജയ് വിഷ്ണു, ഷഫീർ ഖാൻ, ജോസ് ചെങ്ങന്നൂർ, മഞ്ജുശ്രീ എന്നിവരാണ് മറ്റു പ്രമുഖ താരങ്ങൾ.
സുരേഷ് ഗോപിയുടെ ഇരുനൂറ്റി അമ്പത്തിയഞ്ചാമത്തെ ചിത്രമാണ് ജെഎസ്കെ. കോർട് റൂം ഡ്രാമ വിഭാഗത്തിൽപെടുന്ന സിനിമ സുരേഷ് ഗോപി ആരാധകരെ ഇളക്കി മറിക്കുമെന്നുറപ്പാണ്. മറ്റൊരു ലാൽ കൃഷ്ണയാണോ എന്നാണ് ആരാധകർ ഉറ്റുനോക്കുന്നത്. കോസ്മോസ് എന്റർടെയ്ൻമെന്റിന്റെ ബാനറിൽ നിർമ്മിക്കുന്ന ഈ ചിത്രത്തിന്റെ ഛായാഗ്രഹണം രണദിവയാണ്. കോ-റൈറ്റർ ജയ് വിഷ്ണു, എഡിറ്റർ സംജിത് മുഹമ്മദ്.
Comments