രാമാനന്ദ് സാഗറിന്റെ ജനപ്രിയ പരമ്പര രാമായണം വീണ്ടും ടിവിയിൽ എത്തുന്നു . ജൂലൈ 3 മുതൽ ചാനലിൽ രാമായണം സംപ്രേക്ഷണം ആരംഭിക്കുമെന്ന് ഷെമാരൂ ടിവി അറിയിച്ചു. ആദിപുരുഷിന്റെ റിലീസിനു പിന്നാലെയാണ് പുതിയ പ്രഖ്യാപനം.
അരുൺ ഗോവിലും ദീപിക ചിഖാലിയയും ശ്രീരാമനും , സീതയായും എത്തിയ രാമായണം ഒരു കാലത്ത് പ്രേക്ഷകരെ ടിവിയ്‌ക്ക് മുന്നിൽ പിടിച്ചിരുത്തിയ പരമ്പരയാണ്. സുനിൽ ലാഹിരിയാണ് ഇതിൽ ലക്ഷ്മണനായി അഭിനയിച്ചത്.
“ലോകപ്രശസ്ത പുരാണ സീരിയൽ രാമായണം എല്ലാ ആരാധകർക്കും ഞങ്ങളുടെ കാഴ്ചക്കാർക്കുമായി തിരിച്ചെത്തിയിരിക്കുന്നു. ജൂലൈ 3-ന് രാത്രി 7.30-ന് നിങ്ങളുടെ പ്രിയപ്പെട്ട ചാനലായ ഷെമാരൂ ടിവിയിൽ മാത്രം കാണുക.- എന്നാണ് ഷെമാരൂ ടിവിയുടെ ഇൻസ്റ്റാഗ്രാമിൽ കുറിച്ചിരിക്കുന്നത് .
പ്രൊമോ അനാച്ഛാദനം ചെയ്‌തതിന് തൊട്ടുപിന്നാലെ, ചാനലിന്റെ ഇൻസ്റ്റഗ്രാമിൽ ജയ്ശ്രീറാം കമന്റുകൾ നിറഞ്ഞിരിക്കുകയാണ് . 2020-ൽ, കോവിഡ്-ലോക്ക്ഡൗൺ സമയത്ത്, പൊതുജനങ്ങളുടെ ആവശ്യപ്രകാരം പുരാണ പരമ്പരകൾ വീണ്ടും സംപ്രേക്ഷണം ചെയ്യാൻ ദൂരദർശൻ തീരുമാനിച്ചതായി കേന്ദ്ര ഇൻഫർമേഷൻ ആൻഡ് ബ്രോഡ്കാസ്റ്റിംഗ് (ഐ ആൻഡ് ബി) മന്ത്രി പ്രകാശ് ജാവദേക്കർ അറിയിച്ചിരുന്നു.
