ബൈഡന്റെ മുഖത്തെ പാടുകൾ; കാരണം വെളിപ്പെടുത്തി വൈറ്റ് ഹൗസ്; അമേരിക്കൻ പ്രസിഡന്റിന് ബാധിച്ച രോഗമിത്.. 

വാഷിംഗ്ടൺ: അമേരിക്കൻ പ്രസിഡന്റ് ജോ ബൈഡന്റെ മുഖത്തെ പാടുകൾ കണ്ട് പരിഭ്രമിച്ച മാദ്ധ്യമപ്രവർത്തകർക്ക് വൈറ്റ് ഹൗസിന്റെ മറുപടി. യുഎസ് പ്രസിഡന്റിന് സ്ലീപ് അപ്നിയ എന്ന രോഗാവസ്ഥയുണ്ടെന്നും മെഡിക്കേഷന്റെ ഭാഗമായി രാത്രിയിൽ ശ്വസിക്കാൻ സഹായിക്കുന്ന ഒരു മാസ്‌ക് ഉപയോഗിക്കുന്നുണ്ടെന്നും വൈറ്റ് ഹൗസ് അറിയിച്ചു. ഈ മാസ്‌ക് ധരിക്കുന്നതിന്റെ അടയാളങ്ങളാണ് അമേരിക്കൻ പ്രസിഡന്റിന് മുഖത്ത് മാദ്ധ്യമ പ്രവർത്തകർ ശ്രദ്ധിക്കാനിടയായത്. വൈറ്റ് ഹൗസിലെ സൗത്ത് ലോണിലുള്ള മറൈൻ വണ്ണിലേക്ക് പ്രവേശിക്കുന്നതിന് മുമ്പ് മാദ്ധ്യമപ്രവർത്തകരുമായി അദ്ദേഹം സംസാരിക്കവെയായിരുന്നു സംഭവം.

സ്ലീപ് അപ്‌നിയ ഉണ്ടാകുമ്പോൾ ഒരു വ്യക്തിയുടെ ശ്വാസോച്ഛ്വാസത്തിന് തടസം സംഭവിക്കുന്നു. മെഡിക്കൽ സേവനത്തിന്റെ സഹായമില്ലാതെ ഉറക്കത്തിൽ ശ്വാസമെടുക്കാതെ കഴിയാതെ വരികയും ചെയ്യുന്നു. രോഗാവസ്ഥയെ മറികടക്കാൻ സിപിഎപി എന്ന മെഷീനാണ് രോഗികൾ ഉപയോഗിക്കുക. ബൈഡൻ ഉപയോഗിച്ചതും സിപിഎപി തന്നെയാണ്. തനിക്ക് സ്ലീപ് അപ്നിയ ഉണ്ടെന്ന വിവരം 2008ലാണ് ജോ ബൈഡൻ വെളിപ്പെടുത്തിയത്. അമേരിക്കയിൽ മാത്രം ഏകദേശം 30 ദശലക്ഷത്തോളം ആളുകൾക്ക് സ്ലീപ് അപ്നിയ ബാധിച്ചിട്ടുണ്ടെന്നാണ് കണക്ക്.

സ്ലീപ് അപ്നിയയെക്കുറിച്ച് കൂടുതലറിയാം..

ഉറക്കത്തിനിടയിലെ ശ്വാസോച്ഛ്വാസത്തിൽ തകരാർ സംഭവിക്കുന്ന രോഗമാണ് ഒബ്സ്ട്രക്റ്റീവ് സ്ലീപ്പ് അപ്‌നിയ. ശ്വസന വൈകല്യമായി ഇതിനെ വ്യാഖ്യാനിക്കാം. ശ്വാസമെടുക്കുന്നത് പെട്ടെന്ന് നിലച്ചുപോകുകയാണ് സ്ലീപ് അപ്‌നിയ ബാധിച്ചവർക്ക് സംഭവിക്കുന്നത്. ഏതാനും സെക്കൻഡുകൾക്കുള്ളിൽ ശ്വാസം വീണ്ടുമെടുക്കാൻ സാധിക്കുമെങ്കിലും ഇത് ആവർത്തിച്ച് സംഭവിക്കുന്നത് ശരീരത്തിന്റെ പ്രവർത്തനങ്ങളെ ബാധിക്കും.

ഉറക്കത്തിൽ തൊണ്ടയിലെ പേശികൾ ശരിയായി പ്രവർത്തിക്കാതെ വരുന്നതോടെ ശ്വാസമെടുക്കാൻ കഴിയാതെ പോകുന്നതാണ് രോഗം. ഇതിന്റെ പ്രധാന രോഗലക്ഷണമാണ് ഉച്ചത്തിലുള്ള കൂർക്കം വലി. ഇത്തരക്കാർക്ക് ഉറക്കത്തിനിടയിൽ ശ്വാസംമുട്ടലും സംഭവിക്കും. ശ്വാസം മുട്ടൽ സംഭവിക്കുന്നതോടെ ഇവർക്ക് ഉറക്കം നഷ്ടപ്പെടും.

സ്ലീപ് അപ്നിയ ഉള്ളയാൾക്ക്, ഏതാണ്ട് 10 സെക്കൻഡ് നേരത്തേക്കാണ് തുടർച്ചയായി ശ്വാസതടസം അനുഭവപ്പെടുക. ഇത് രക്തത്തിലെ ഓക്‌സിജന്റെ അളവ് കുറയുന്നതിനും കാർബൺ ഡൈ ഓക്‌സൈഡിന്റെ അളവ് കൂട്ടുന്നതിനും കാരണമാകും. ഇക്കാര്യം തലച്ചോർ അറിയുന്നതോടെ രോഗി ഉറക്കത്തിൽ നിന്നുണരും. രാത്രി ഉറക്കത്തിൽ ഈ ഒരു പാറ്റേൺ സംഭവിച്ചുകൊണ്ടേയിരിക്കും. മണിക്കൂറിൽ ഏതാണ്ട് മുപ്പത് തവണ ഇത്തരത്തിൽ ആവർത്തിച്ചേക്കാം.

സ്ലീപ് അപ്നിയയുടെ മറ്റ് ലക്ഷണങ്ങൾ:

ഉയർന്ന രക്തസമ്മർദ്ദം
അമിതമായ പകൽ ഉറക്കം
ഉച്ചത്തിൽ കൂർക്കം വലിക്കുക
തൊണ്ടവേദന അനുഭവപ്പെട്ട് ഉറക്കം നഷ്ടമാകുക.
വായയിൽ ഈർപ്പം ഇല്ലാത്തതായി അനുഭവപ്പെടുക.
അതിരാവിലെ തലവേദന തോന്നുക
വിഷാദം ഉണ്ടാകുക

ഹൃദയസംബന്ധമായ രോഗങ്ങൾ, നയന രോഗങ്ങൾ, അമിതമായ ക്ഷീണം എന്നിവയും രോഗികൾക്ക് ഉണ്ടായേക്കാം. സ്ലീപ്പ് അപ്നിയ എന്ന രോഗത്തിന് ചികിത്സ ലഭ്യമാണ്. രോഗം സ്ഥിരീകരിച്ചാൽ ഉടനടി ഡോക്ടറുടെ ഉപദേശം തേടുകയാണ് ചെയ്യേണ്ടത്. ശസ്ത്രക്രിയ ഉൾപ്പെടെയുള്ള മാർഗങ്ങളും ഉപകരണങ്ങളുടെ സഹായത്തോടെ ശ്വാസമെടുക്കുന്നതിനുള്ള സംവിധാനങ്ങളും രോഗത്തിന് ഫലപ്രദമാണ്.