എറണാകുളം: പ്രധാനമന്ത്രി നരേന്ദ്രമോദിയുടെ ഈജിപ്ത് സന്ദർശന വേളയിൽ ഭക്ഷണമൊരുക്കാൻ സാധിച്ചതിന്റെ സന്തോഷത്തിലാണ് ഏലൂർ പാട്ടാണിൽ അനൂപ്അഷറഫ്. ഭക്ഷണത്തിൽ സംതൃപ്തനായ പ്രധാനമന്ത്രി വിശേഷങ്ങൾ ചോദിച്ചറിഞ്ഞ ശേഷം ഒപ്പം ഫോട്ടോ എടുക്കുന്നതിനും നിന്ന നിമിഷങ്ങളെ ഓർത്തുള്ള ആഹ്ലാദത്തിലാണ് അനൂപ് ഇപ്പോൾ. വിദേശകാര്യ മന്ത്രി ജയശങ്കറും ഈ വേളയിൽ ഒപ്പമുണ്ടായിരുന്നു. കേട്ടറിഞ്ഞതിനേക്കാൾ വളരെ സിംപിളാണെന്നാണ് പ്രധാനമന്ത്രിയെക്കുറിച്ച് അനൂപ് പറഞ്ഞത്.
ഇതിനോടകം തന്നെ നിരവധി പ്രമുഖ വ്യക്തിത്വങ്ങൾക്ക് ഭക്ഷണമൊരുക്കാൻ അനൂപിന് സാധിച്ചിട്ടുണ്ട്. പല രാജ്യങ്ങളുടെയും തലവന്മാർക്കും ഭക്ഷണം തയാറാക്കി ന്ൽകാൻ കഴിഞ്ഞിട്ടുണ്ടെന്ന് അനൂപ് പറയുന്നു. അനൂപ് തന്റെ പാചകകല തുടങ്ങിയിട്ട് 21 വർഷം പിന്നിടുന്നു. മൂന്ന് വർഷത്തോളമായി കെയ്റോയിലെ ഹോട്ടലിൽ എക്സിക്യൂട്ടീവ് ഷെഫ് ആയിട്ടാണ് അനൂപ് ജോലി ചെയ്യുന്നത്.
കളമശേരി ഗവ.ഫുഡ് ക്രാഫ്റ്റ് ഇൻസ്റ്റിറ്റ്യൂട്ടിൽ നിന്ന് പഠിച്ചിറങ്ങിയ അനൂപ് കേരളത്തിലെ തന്നെ പ്രമുഖ പഞ്ചനക്ഷത്ര ഹോട്ടലുകളിൽ ജോലി ചെയ്തിട്ടുണ്ട്. ഒമാൻ രാജകുടുംബത്തിന്റെ ഷെഫായും ഇദ്ദേഹം പ്രവർത്തിച്ചിട്ടുണ്ട്. കഴിഞ്ഞ ശനിയും ഞായറുമായിരുന്നു പ്രധാനമന്ത്രി ഹോട്ടലിൽ എത്തിയത്. കേന്ദ്ര ഗവൺമെന്റ് ഉദ്യോഗസ്ഥർ വെള്ളിയാഴ്ച അനൂപിന്റെ വീട്ടിലെത്തി അന്വേഷണം നടത്തിയിരുന്നു.
