ഒരു വ്യക്തിയുടെ ജനനം മുതൽ മരണം വരെയുള്ള ജീവിത യാത്രയിലെ അവസാന താളുകളാണ് വാർദ്ധ്യക്യം എന്ന് ചിന്തിക്കുന്നവരാണ് അധികവും.നല്ല വസ്ത്രം ധരിച്ച് ഒരുങ്ങി നടക്ക് എന്നു പറഞ്ഞാൽ ഈ വയസാം കാലത്ത് വേറെ പണിയില്ല, ഈ കുഴിയിലേയ്ക്ക് കാലും നീട്ടി ഇരിയ്ക്കുന്ന ഞാൻ ഇനി ഇതൊക്കെ കൂടി ചെയ്യാം എന്നിങ്ങനെയുള്ള മറുപടികൾ കേൾക്കാത്ത കൊച്ചുമക്കളും മക്കളും ചുരുക്കമായിരിക്കും. എന്നാൽ ഇതിൽ നിന്നൊക്കെയും വ്യത്യസ്തമായ ഒരു വീഡിയോ ആണ് ഇപ്പോൾ സമൂഹമാദ്ധ്യമങ്ങളിൽ പ്രചരിച്ചു കൊണ്ടിരിക്കുന്നത്. ജീവിതത്തിൽ വളരെയധികം സന്തോഷം നൽകുന്ന കാര്യങ്ങൾ ചെയ്യാൻ മനസും ആരോഗ്യവും ഒപ്പമുണ്ടെങ്കിൽ പ്രായമൊന്നും അതിന് ഒരു വിലങ്ങു തടിയാകില്ലെന്ന് തെളിയിച്ചിരിക്കുകയാണ് കണ്ണൂർ ആലക്കോട് സ്വദേശിയായ മേരി എന്ന മുത്തശ്ശി.
95-കാരിയായ മേരി തന്റെ കൊച്ചുമകൾ പ്രിൻസിയുടെ സഹായത്തോടെ മേക്കോവർ ചെയ്തതിന്റെ വീഡിയോ ആണ് ഇപ്പോൾ സമൂഹമാദ്ധ്യമങ്ങളിൽ വൈറലായിരിക്കുന്നത്. ഒരു ദിവസം ഫോണിൽ ഒരു മേക്കോവർ വീഡിയോ കണ്ട് മേരിയ്ക്ക് വളരെയധികം ഇഷ്ടപ്പെട്ടു. വീഡിയോ കണ്ടപ്പോൾ തോന്നിയ ആഗ്രഹം മേരി ബ്യൂട്ടി പാർലർ നടത്തുന്ന കൊച്ചുമകളോട് പങ്കുവെച്ചു. രണ്ടാമതൊന്ന് ചിന്തിയ്ക്കാതെ വല്ല്യമ്മച്ചിയുടെ ആഗ്രഹത്തിന് പ്രിൻസി സമ്മതം മൂളി. മേക്കപ്പിടാനും ഒരുങ്ങി മോഡേൺ ലുക്കിൽ നടക്കാനുമുള്ള വല്ല്യമ്മച്ചിയുടെ ആഗ്രഹം പ്രിൻസി നിറവേറ്റി.
ചട്ടയും മുണ്ടും ധരിച്ച് നാടൻ ലൂക്കിൽ ബ്യൂട്ടിപാർലറിലേയ്ക്ക് കയറിയ മേരി വെസ്റ്റേൺ ലുക്കിലേയ്ക്ക് എത്തിയതോടെ ആളാകെ മാറുകയായിരുന്നു. ലിപ്സ്റ്റിക്കും ഐഷാഡോയും ബ്ലഷും നല്ല ബ്രൗൺ നിറത്തിലുള്ള മുടിയുമെല്ലാമായി ഒന്നാന്തരം വെസ്റ്റേൺ മേരിയായി കൊച്ചുമക്കളുടെ വല്ല്യമ്മച്ചി മാറുകയായിരുന്നു. മോഡേൺ ഡ്രസിനൊപ്പം കൂളിംഗ് ഗ്ലാസ് കൂടി വെച്ചതോടെ സംഭവം കളർഫുൾ ആയി. ‘ആഗ്രഹങ്ങളെല്ലാം ഉള്ളിലൊളിപ്പിച്ച് നടക്കുന്ന ഒരുപാട് പേർ നമ്മുടെ നാട്ടിലുണ്ട്. ആ സ്വപ്നങ്ങളെല്ലാം നമ്മൾ നടത്തിക്കൊടുക്കണം. ചിലപ്പോൾ ചമ്മലും നാണക്കേടും ഓർത്താകും അവർ അത് തുറന്നുപറയാത്തത്. എന്നാൽ നമ്മൾ അവരുടെ ഒപ്പം നിന്നാൽ എല്ലാ കാര്യങ്ങളും വൃത്തിയായി നടക്കും’ എന്നായിരുന്നു മേരി പറഞ്ഞത്.
