മോഹൻലാൽ നായകനായവുന്ന പുതിയ ചിത്രം വൃഷഭയുടെ പുതിയ വാർത്തകൾക്കായി കാത്തിരിക്കുകയാണ് ആരാധകർ. മോഹന്ലാലിന്റേതായി വരാനിരിക്കുന്ന ശ്രദ്ധേയ പ്രോജക്റ്റുകളില് ഒന്നാണ് വൃഷഭ. പ്രധാനമായും തെലുങ്കിലും തമിഴിലുമായി നിര്മ്മിക്കപ്പെടുന്ന പാൻ ഇന്ത്യൻ ചിത്രമായാണ് വൃഷഭ പ്രേക്ഷകർക്ക് മുന്നിലെത്തുക. നന്ദ കിഷോറിന്റെ സംവിധാനത്തിലാണ് ചിത്രം ഒരുങ്ങുന്നത്. ആക്ഷനും ഇമോഷനും ചേർത്തിണക്കിയ ബഹുഭാഷ ചിത്രമായിരിക്കും ഇതെന്ന് മോഹൻലാൽ നേരത്തെ സൂചിപ്പിച്ചിരുന്നു. മലയാളം, കന്നഡ, ഹിന്ദി ഭാഷകളിലും പ്രദര്ശനത്തിനെത്തും.
എന്നാല് സിനിമാപ്രേമികള്ക്ക് ഏറെ ആകാംക്ഷ പകര്ന്ന ഈ പ്രോജക്റ്റ് സംബന്ധിച്ച അധികം അപ്ഡേറ്റുകള് പുറത്തെത്തിയിട്ടില്ല. ഇപ്പോഴിതാ വൃഷഭ സംബന്ധിച്ച ഒരു പ്രധാന വിവരം പുറത്തെത്തിയിരിക്കുകയാണ്. ബോളിവുഡിലെ പ്രമുഖ നിര്മ്മാതാവ് ഏക്ത കപൂറും ചിത്രത്തിന്റെ നിര്മ്മാണ പങ്കാളി ആയിരിക്കും എന്നതാണ് അത്. ഇതോടെ ഇത് ഏക്ത കപൂറിന്റെ ആദ്യ പാന് ഇന്ത്യന് ചിത്രം ആയിരിക്കുമെന്നും മുംബൈയില് യാഷ് രാജ് ഫിലിംസിന്റെ ഓഫീസില് വച്ച് ഏക്തയും മോഹന്ലാലുമായുള്ള കൂടിക്കാഴ്ച ഇന്ന് നടക്കുമെന്നുമാണ് റിപ്പോർട്ട്. ഇതിനെ സാധൂകരിക്കുംവിധമാണ് മുംബൈയിലെ യൈആര്എഫ് സ്റ്റുഡിയോസ് ഓഫീസിലേക്ക് വാഹനത്തില് എത്തുന്ന മോഹന്ലാലിന്റെ വീഡിയോ ട്വിറ്ററില് പ്രചരിക്കുന്നത്.
അതേസമയം 200 കോടിയാണ് ചിത്രത്തിന്റെ മുടക്കുമുതലെന്ന തരത്തില് റിപ്പോര്ട്ടുകള് എത്തുന്നത്. ഏക്ത കപൂറിന്റെ ബാലാജി ടെലിഫിലിംസ് കൂടാതെ എവിഎസ് സ്റ്റുഡിയോസ്, കണക്റ്റ് മീഡിയ എന്നീ ബാനറുകള് സംയുക്തമായാണ് ചിത്രം നിര്മ്മിക്കുക. ഇതോടെ ബാഹുബലിയുടെ ഉത്തരേന്ത്യന് മാര്ക്കറ്റിന് കരണ് ജോഹറിന്റെ സാന്നിധ്യം എത്രത്തോളം സഹായകരമായോ അതേപോലെയാവും വൃഷഭ ടീമിലെ ഏക്ത കപൂറിന്റെ സാന്നിധ്യമെന്ന് ഒരു അടുത്ത വൃത്തത്തെ ഉദ്ധരിച്ച് ബോളിവുഡ് ഹംഗാമ റിപ്പോര്ട്ട് ചെയ്യുന്നു.
