ബെർലിൻ: ഫിറ്റ്നെസ്സ് ഇൻഫ്ളുവൻസറും ജെർമ്മൻ യൂട്യൂബറുമായ ജോ ലിൻഡെർ അന്തരിച്ചു. 30-ാം വയസിലായിരുന്നു അന്ത്യം. അന്യൂറിസം മൂലമായിരുന്നു യുവാവിന്റെ വേർപാട്. കാമുകി നിച്ചയാണ് ലിൻഡെറിന്റെ മരണവാർത്ത സ്ഥിരീകരിച്ചത്.
ഇൻസ്റ്റഗ്രാമിൽ 8.5 ദശലക്ഷം ഫോളോവേഴ്സുള്ള ഫിറ്റ്നെസ്സ് ഇൻഫ്ളുവൻസറിന് യൂട്യൂബിൽ ഒമ്പതര ലക്ഷം സബ്സ്ക്രൈബേഴ്സുമുണ്ട്. ഫിറ്റ്നെസ്സ് സംബന്ധിച്ച് ധാരാളം നുറുങ്ങുവിദ്യകൾ പങ്കുവക്കുന്ന ലിൻഡെറിന് സോഷ്യൽ മീഡിയയിൽ ആരാധകരേറെയാണ്. ലിൻഡെറിന്റെ അപ്രതീക്ഷിത മരണം വലിയ നടുക്കമാണ് ആരാധകർക്കിടയിൽ ഉണ്ടാക്കിയിരിക്കുന്നത്.
ലിൻഡെറിന്റെ മരണത്തിന് കാരണമായ അന്യൂറിസം എന്ന രോഗാവസ്ഥ രക്തക്കുഴലുകളെ ബാധിക്കുന്ന ആരോഗ്യ പ്രശ്നമാണ്. മൂന്ന് ദിവസം മുമ്പ് കലശലായ കഴുത്ത് വേദന അനുഭവപ്പെട്ടതിന് പിന്നാലെയാണ് ലിൻഡെറിനെ ആശുപത്രിയിൽ പ്രവേശിപ്പിച്ചത്. എന്നാൽ വൈദ്യ പരിശോധന നടത്തി രോഗം സ്ഥിരീകരിച്ചപ്പോഴേക്കും ഏറെ വൈകിയെന്ന് കാമുകി നിച്ച പറയുന്നു.
