ജനീവ : കാലാവസ്ഥ വ്യതിയാനം മൂലം മനുഷ്യ ജീവിതങ്ങൾ ബുദ്ധിമുട്ടിലാവുന്ന സാഹചര്യത്തിൽ കാലാവസ്ഥ നീതി ആഗോള തലത്തിൽ കൈവരിക്കുന്നതിന്റെ പ്രസക്തി ഇന്റർനാഷണൽ ഫോർ മീഡിയ ആന്റ് ഡെവലപ്മെന്റ് പ്രസിഡന്റ് മുഹമ്മദ് അൽ ഹമ്മദി ചൂണ്ടിക്കാട്ടി. ഐക്യരാഷ്ട്രസഭയുടെ മനുഷ്യവകാശ കൗൺസിലിന്റെ (യുഎൻഎച്ച്ആർസി) 53-ാമത് റഗുലർ സെഷനിലാണ് അദ്ദേഹം ഈ കാര്യം സൂചിപ്പിച്ചത്.
കാലാവസ്ഥാ വ്യതിയാനത്തെ കുറിച്ചുള്ള യുഎൻ ഫ്രെയിംവർക്ക് കൺവെൻഷന്റെ 28-ാമത് സമ്മേളനത്തിന് യുഎഇ ആതിഥേയത്വം വഹിക്കും. നവംബറിൽ ദുബായ് എക്സ്പോ സിറ്റി ലോകമെമ്പാടുമുള്ള കലാവസ്ഥാ നീതിയെ പ്രോത്സാഹിപ്പിക്കുന്ന പ്രമുഖ വേദിയായി പ്രവർത്തിക്കും.
ലോകം കലാവസ്ഥാ നീതി കൈവരിക്കേണ്ടതിന്റെ ആവശ്യകതയും, ലോകത്തേയും ജനങ്ങളേയും കാലാവസ്ഥാ വ്യതിയാനത്തിൽ നിന്നും സംരക്ഷിക്കുന്നതിൽ യുഎൻഎച്ച്ആർസി നടത്തിയ കഠിന പരിശ്രമങ്ങളേയും അൽ ഹമ്മദി അടിവരയിട്ടു. പരിസ്ഥിതിയുടെ സന്തുലിതാവസ്ഥയിലെ ചലനം സാരമായി ബാധിച്ച ജനങ്ങളുടെ അവകാശങ്ങൾ സംരക്ഷിക്കേണ്ടതിന്റെ ആവശ്യകത അദ്ദേഹം ഊന്നി പറഞ്ഞു. ആഗോളതലത്തിൽ കാലാവസ്ഥാ നീതി വർദ്ധിപ്പിക്കുന്നതിൽ നിർണായക തീരുമാനങ്ങൾ കൈകൊള്ളുന്നതിനും ജനങ്ങളുടെ അവകാശങ്ങൾ സംരക്ഷിക്കുന്നതിനും യുഎഇ ആതിഥേയത്വം വഹിക്കുന്ന COP28ന്റെ അവസരം പ്രയോജനപ്പെടുത്തണമെന്ന് അൽ ഹമ്മദി അഭിപ്രായപ്പെട്ടു. യുഎൻഎച്ച്ആർസിയുടെ 53-ാമത് റെഗുലർ സെഷന്റെ യോഗങ്ങൾ 2023 ജൂൺ, ജൂലൈ മാസങ്ങളിൽ നടക്കും. കൂടാതെ കാലാവസ്ഥാ നീതി കൈവരിക്കേണ്ടതിന്റെ ആവശ്യകതയെ അടിസ്ഥാനമാക്കിയും കാലാവസ്ഥാ വ്യതിയാനം സാരമായി ബാധിച്ച മനുഷ്യരുടെ ആവശ്യങ്ങളും അവകാശങ്ങളും സംരക്ഷിക്കുന്നതിനായുള്ള മാർഗങ്ങളും യോഗത്തിൽ ചർച്ചാ വിഷയമാകും
Comments