ഇരുചക്രവാഹന വിപണിയിലെ ബ്രിട്ടീഷ് വമ്പന്മാരായ ട്രയംഫും ഇന്ത്യൻ ഭീമന്മാരായ ബജാജും കൈകോർത്ത് പുറത്തിറക്കുന്ന ആദ്യ ബൈക്ക് സ്പീഡ് 400ന്റെ പ്രാരംഭ വില പ്രഖ്യാപിച്ചു. ആദ്യം ബുക്ക് ചെയ്യുന്ന പതിനായിരം പേർക്ക് വിലക്കിഴവും കമ്പനി വാഗ്ദാനം ചെയ്യുന്നു. 2.23 ലക്ഷമാണ് പ്രാരംഭ വിലയായി പ്രഖ്യാപിച്ചിരിക്കുന്നത്. ഈ വിലയിൽ ആദ്യം ബുക്ക് ചെയ്യുന്ന പതിനായിരം പേർക്ക് വാഹനം ലഭിക്കും. ഇതിന് ശേഷം വാഹന വില 2.33 ലക്ഷം രൂപയായിരിക്കുമെന്നും ട്രയംഫ് വ്യക്തമാക്കി. അതേസമയം സ്ക്രാംബ്ലർ 400 എക്സിന്റെ വില മറ്റൊരു തീയതിയിൽ പ്രഖ്യാപിക്കുമെന്നും കമ്പനി വ്യക്തമാക്കി. ബജാജിന്റെ മഹാരാഷ്ട്ര ഗ്യാരേജിലാകും ബൈക്കുകളുടെ ഉത്പാദനം. ഹാർലി ഡേവിഡ്സൺ ഹീറോയുമായി സഹകരിച്ച് നിർമ്മിച്ച എക്സ് 440 വെല്ലുവിളിയുമായാണ് ട്രയംഫ് എത്തുന്നത്.
398 സിസി സിംഗിൾ സിലിണ്ടർ ലിക്വിഡ് കൂൾഡ് എൻജിനാണ് സ്പീഡ് 400ൽ. ട്രയംഫ് വികസിപ്പിച്ച ടിആർ സീരിസ് എൻജിനാണിത്. 8000 ആർപിഎമ്മിൽ 40 എച്ച്പി കരുത്തും 6500 ആർപിഎമ്മിൽ 37.5 എൻഎം ടോർക്കും ഈ എൻജിൻ ഉത്പാദിപ്പിക്കും. കെടിഎം 390 സിസി ലൈനപ് വാഹനങ്ങളുടേതിനു സമമാണ് എൻജിന്റെ പ്രവർത്തനങ്ങൾ. 6 സ്പീഡാണ് ഗിയർബോക്സ്. ലിക്വിഡ് കൂൾഡ് എൻജിനാണ് ഇത്. ട്രയംഫിന്റെ വലിയ വാഹനങ്ങളിലേതു പോലെ തന്നെ ത്രികോണാകൃതിയിലുള്ള എൻജിൻ കവറും വാഹനത്തിനു വലതുവശത്തുണ്ട്. ബ്രിട്ടീഷ് നിർമാതാക്കളായ ട്രയംഫിന്റെ നിർമാണ മികവുകൾ വാഹനത്തിന്റെ ഭൂരിഭാഗം മേഖലകളിലും പ്രകടമാണ്.
ട്യൂബുലർ സ്റ്റീലിൽ നിർമിച്ച സ്പൈൻ-പെരിമീറ്റർ ഹൈബ്രിഡ് ഫ്രെയിമാണ് വാഹനത്തിലുള്ളത്. 17 ഇഞ്ച് വീലുകളാണ് സ്പീഡ് 400 സീരിസിൽ. മെറ്റ്സെലർ സോഫ്റ്റ് കോംപൗണ്ട് ടയറുകളാണ്. എൽഇഡി ലൈറ്റ് സംവിധാനങ്ങളും, റൈഡ് ബൈ വയർ സാങ്കേതിക വിദ്യയും ഡ്യുവൽ ചാനൽ എബിഎസ്, മാറ്റാൻ സാധിക്കുന്ന വിധത്തിലുള്ള ട്രാക്ഷൻ കൺട്രോൾ എന്നിവയും യുഎസ്ബി സി ചാർജിങ് പോർട്ട്, സെമി ഡിജിറ്റൽ ഇൻസ്ട്രമെന്റേഷൻ എന്നിവയും വാഹനത്തിലുണ്ട്. വളഞ്ഞ ഇന്ധന ടാങ്കുകളാണ് മറ്റൊരു പ്രത്യേകത. 176 കിലോയാകും ഭാരം. കാർണിവൽ റെഡ് വിത്ത് ഫാന്റം ബ്ലാക്ക്, കാസ്പിയൻ ബ്ലൂ വിത്ത് സ്റ്റോം ഗ്രേ, ഫാന്റം ബ്ലാക്ക് വിത്ത് സ്റ്റോം ഗ്രേ എന്നീ ഡിസൈനിലാണ് വാഹനം ലഭ്യമാകുന്നത്.
