തിരക്കഥാകൃത്ത് അഭിലാഷ് പിള്ളയ്ക്ക് കരിയർ ബ്രേക്ക് നൽകിയ ചിത്രമായിരുന്നു മാളികപ്പുറം. ഒരിടവേളയ്ക്ക് ശേഷം മലയാളത്തിൽ സൂപ്പർഹിറ്റ് സമ്മാനിക്കാനിക്കാനും തീയേറ്ററുകളിലേക്ക് കുടുംബപ്രേക്ഷകരെ തിരിച്ചുകൊണ്ടുവരാനും മാളികപ്പുറത്തിലൂടെ അഭിലാഷ് പിള്ളയ്ക്ക് സാധിച്ചു. ഇപ്പോഴിതാ സിനിമ എന്ന സ്വപ്നത്തെ എങ്ങനെ സാക്ഷാത്കരിക്കാം എന്ന് പറയുകയാണ് അഭിലാഷ് പിള്ള.
ഇൻസ്റ്റാഗ്രാം വീഡിയോയിലൂടെയാണ് സിനിമ എന്ന സ്വപ്നം എങ്ങനെ സാക്ഷാത്കരിക്കാമെന്നും സിനിമാ മേഖലിയിൽ എത്തിപ്പെടാനുള്ള ചവെല്ലുവിളികൾ എന്തൊക്കെയാണെന്നുമൊക്കെ അഭിലാഷ് പിള്ള പറയുന്നത്. നിമിഷ നേരങ്ങൾക്കുള്ളിൽ തന്നെ വീഡിയോ സമൂഹമാദ്ധ്യമങ്ങളിൽ വൈറലാവുകയും ചെയ്തു. സിനിമയെ ആത്മർത്ഥമായിട്ട് ഇഷ്ടപെടുന്ന അല്ലെങ്കിൽ സിനിമ ജീവനായി കൊണ്ടുനടക്കുന്ന ആർക്കും സിനിമാക്കാരൻ ആകാൻ സാധിക്കും. ഇത് പാഷനായോ ടൈംപാസായി കാണുന്നവർ ഈ വഴിക്ക് വരരുതെന്നാണ് അദ്ദേഹം പറയുന്നത്.
‘സിനിമയിലേയ്ക്ക് എത്തുക എന്ന സ്വപ്നം കാണുന്നവരോട് പറയാനുള്ളത്. എന്നെ പോലെയുള്ള പത്തനംതിട്ടക്കർക്കോ അല്ലെങ്കിൽ വയനാട്ടുകാർക്കോ അത്ര എളുപ്പമായിരിക്കില്ല. എറണാകുളം ജില്ലയിലാണ് ഇപ്പോൾ സിനിമ ഫോക്കസ് ചെയ്യുന്നത് മുഴുവൻ. എറണാകുളം ജില്ല വിട്ടിലുള്ളവർക്ക് സിനിമയിലെത്തുക എന്ന് പറഞ്ഞാൽ എളുപ്പം സാധ്യമല്ല. ഇത്ര വലിയ ലോകം അല്ല അവർ കാണുന്നത്. എന്നാൽ എന്നെ പോലെ ഒരു കഥാകൃത്തിന് എറണാകുളത്ത് വന്നാൽ ഉണ്ടാകുന്ന ചിലവ്, ഇവിടെ എത്താനുള്ള ചിലവ്, താമസിക്കാൻ, സിനിമപ്രവർത്തകരെ കാണാനുള്ള ചിലവ് ഇതൊക്കെയുണ്ട്.
എന്നാൽ ഞാൻ പത്തനംതിട്ടയിൽ നിന്നും കൊച്ചിയിലെത്തി ഒരു സിനിമ ചെയ്തിട്ടുണ്ടെങ്കിൽ എനിക്ക് ഒരു സിനിമാക്കാരനാകാൻ പറ്റിയിട്ടുണ്ടെങ്കിൽ ഞാൻ ഒരു തിരകഥകൃത്തായിട്ടുണ്ടെങ്കിൽ ഇവിടെ വരെ എത്തിയിട്ടുണ്ടെങ്കിൽ ഇത് ആർക്കും സാധിക്കും. അതുകൊണ്ടാണ് ഞാൻ എന്റെ ലൈഫ് എല്ലായിടത്തും പറയുന്നത്. സിനിമയെ ആത്മാർത്ഥമായിട്ട് ഇഷ്ടപെടുന്ന അല്ലെങ്കിൽ സിനിമ ജീവനായി കൊണ്ടുനടക്കുന്ന ആർക്കും സാധിക്കും. ഇത് ടൈംപാസായി കാണുന്നവർ ഈ വഴിക്ക് വരരുതെന്നെ ഞാൻ പറയൂ.. കാരണം അത്രയും ആത്മാർത്ഥയോടെ ഹാർഡ്വർക്കോടെ നിൽക്കുന്നവർ പുറത്തുണ്ട്.
പല കുട്ടികളും എനിക്ക് മെസേജ് അയക്കും. ഒരു വർഷമായി സിനിമയുടെ പിന്നാലെയാണ് ഒന്നുമായില്ല എന്ന് പറയും. അങ്ങനെയാണെങ്കിൽ നിർത്താൻ പറയും. കാരണം ഒന്നര വർഷത്തിൽ സിനിമ മടുത്തെങ്കിൽ അവൻ നല്ലൊരു സിനിമക്കാരനാകില്ല. ഇതൊരു ഹൈവേയാണ് യുടേൺ ഇല്ല. ഇതിന്റെ അവസാനം എവിടെയാണന്ന് എനിക്കറിയില്ല. ഞാൻ അത് നോക്കി പോകുകയാണ്. ഇനിയെത്ര ദൂരം പോകണമെന്ന് എനിക്കറിയില്ല. ഇനിയും ദൂരങ്ങൾ കിടക്കുകയാണ് യാത്രയുടെ ഇടയിൽ പരമാവധി നല്ല സിനിമകൾ ചെയ്യു അത്ര മാത്രം.’- അഭിലാഷ് പിള്ള പറഞ്ഞു.
