പാലക്കാട്: പട്ടാമ്പി തിരുവേഗപ്പുറ പപ്പടപടിയിൽ കുളത്തിൽ മുങ്ങി രണ്ട് കുട്ടികൾ മരിച്ചു. കാരക്കൂത്ത് വീട്ടിൽ ശിഹാബ് മുസ്ലിയാരുടെ മകൾ ഫാത്തിമ സഹറ (5), സഹോദരൻ ഷൗക്കത്തിന്റെ മകൻ മുഹമ്മദ് ഹനാൻ (2.5) എന്നിവരാണ് മരിച്ചത്.
ഇന്നലെ വൈകുന്നേരമാണ് ദാരുണമായ അപകടം ഉണ്ടായത്. വീടിന്റെ മുറ്റത്ത് കളിച്ചുകൊണ്ടിരുന്ന കുട്ടികളെ കുറച്ചുസമയത്തിന് ശേഷം കാണാതാവുകയായിരുന്നു. തുടർന്ന് നടത്തിയ തിരച്ചിലിൽ വീടിന് സമീപം 50 മീറ്ററോളം അകലെയുള്ള കുളത്തിൽ നിന്ന് കുട്ടികളെ കണ്ടെത്തി.
ഉടൻ പെരിന്തൽമണ്ണയിലെ സ്വകാര്യ ആശുപത്രിയിൽ എത്തിച്ചെങ്കിലും ഫാത്തിമ സഹറയുടെ മരണം സ്ഥിരീകരിച്ചു. ജീവനുണ്ടായിരുന്ന മുഹമ്മദ് ഹനാനെ വെന്റിലേറ്ററിലേക്ക് മാറ്റിയെങ്കിലും ഇന്ന് രാവിലെയോടെ മരണം സംഭവിച്ചു. സംഭവത്തിൽ കൊപ്പം പൊലീസ് മേൽനടപടികൾ സ്വീകരിച്ചു.
