അന്താരാഷ്ട്ര ക്രിക്കറ്റിൽ നിന്ന് വിരമിച്ച ധോണി സിനിമ മേഖലയിൽ പുതിയ ഇന്നിംഗ്സിന് തുടക്കമിട്ടിരുന്നു. തമിഴ് സിനിമയിലെ തന്റെ ആദ്യ നിർമ്മാണ സംരംഭമായ ലെറ്റ്സ് ഗെറ്റ് മാരീഡ് എന്ന ചിത്രത്തിന്റെ ഓഡിയോ ലോഞ്ചിന് നടൻ ഇന്നലെ ചെന്നൈയിൽ എത്തി. ഇതിനിടെ രസകരമായൊരു സംഭവവും അരങ്ങേറി.
ട്രെയിലർ ലോഞ്ചിനിടെ നടൻ യോഗി ബാബുവുമായി നടത്തിയ സംഭാഷണമാണ് സമൂഹമാദ്ധ്യമങ്ങളിൽ വൈറലായത്. ധോണിയും ഭാര്യ സാക്ഷിയും ചേർന്നാണ് സിനിമയുടെ നിർമ്മാണം. ടീമിലെടുക്കാമോ എന്ന ചോദ്യത്തിന് മാനേജ്മെന്റിനോട് സംസാരിക്കാമെന്നും സ്ഥിരമായി കളിക്കാനെത്തണമെന്നും ധോണി പറയുന്നു.
ധോണിയുടെ വാക്കുകൾ ഇങ്ങനെ ‘റായുഡു വിരമിച്ചു. ആ ഒഴിവുണ്ട്. ഞാൻ മാനേജ്മെന്റിനോട് സംസാരിക്കാം. പക്ഷേ നിങ്ങൾ സിനിമയിൽ നല്ല തിരക്കിലല്ലേ, സ്ഥിരമായി കളിക്കാനെത്തണം അത് ആദ്യമേ പറഞ്ഞേക്കാം, പിന്നെ അവർ നല്ല വേഗതയിലാകും പന്തെറിയുക, എറിഞ്ഞ് വീഴ്ത്താൻ വരെ ശ്രമിക്കും’ എന്നായിരുന്നു തമാശ കലർത്തിയുള്ള ധോണിയുടെ മറുപടി.
ഒരു ഫാമിലി എന്റർടെയ്നർ ചിത്രമാണ് ലെറ്റ്സ് ഗെറ്റ് മാരീഡ്. ചിത്രത്തിൽ യോഗി ബാബുവും ഹരീഷ് കല്യാണും മലയാളിയായ ഇവാനയും നദിയാ മൊയ്ദുവുമാണ് പ്രധാന വേഷത്തിൽ എത്തുന്നത്. ചെന്നൈയിലെ ലീല പാലസിൽ വെച്ചായിരുന്നു ട്രെയ്ലർ ലോഞ്ച്. അടുത്തവർഷം ആദ്യമാകും ചിത്രം തീയേറ്ററുകളിൽ എത്തുക. രമേഷ് തമിഴ്മണിയാണ് ചിത്രത്തിന്റെ സംഗീത സംവിധാനം നിർവഹിക്കുന്നത്.
