ഇടുക്കി : മൂന്നാറിൽ അരി തേടി ഒറ്റയാൻ പടയപ്പയും. മറയൂർ പാമ്പൻ മലയിലെ തൊഴിലാളികളുടെ ലയത്തിനുള്ളിൽ പ്രവേശിച്ചാണ് പടയപ്പയുടെ പരാക്രമം. വീടുകളുടെ വാതിൽ തകർത്ത് ഒറ്റയാൻ അരി ഭക്ഷിച്ചു.
രണ്ടാഴ്ചയോളമായി മറയൂരിലെ വിവിധ ഭാഗങ്ങളിൽ കറങ്ങി നടക്കുന്ന കൊമ്പൻ ഇന്നലെ അർദ്ധരാത്രിയിലാണ് വീടുകൾ തകർത്ത്. ഒരു ചാക്ക് അരിയാണ് ലയത്തിനുള്ളിൽ നിന്ന് പുറത്തേക്ക് വലിച്ചിട്ട് കൊമ്പൻ കഴിച്ചത്. വാതിലും ജനലും തകർത്തായിരുന്നു പടയപ്പയുടെ അരി വേട്ട. ലയത്തിലെ താമസക്കാരയരാജേന്ദ്രൻ, കുറുപ്പുസ്വാമി എന്നിവരുടെ വീടുകളാണ് ആന തകർത്തത്.
വലിയ ശബ്ദം കേട്ട് പുറത്തിറങ്ങി നോക്കിയപ്പോഴാണ് തൊഴിലാളികൾ പടയപ്പയെ കണ്ടത്. പൊതുവേ ശാന്തനായിരുന്ന പടയപ്പ അടുത്തിടെയായി അക്രമ സ്വഭാവങ്ങൾ കാണിക്കുന്നത് നാട്ടുകാരിൽ ഭീതി പരത്തുന്നുണ്ട്. വനം വകുപ്പ് അടിയന്തിരമായി ഇടപെടണം എന്നാണ് പൊതു ആവശ്യം.
