ബാഹുബലി എന്ന ഒറ്റ ചിത്രം കൊണ്ട് ഇന്ത്യയൊട്ടുക്കെ ആരാധകരെ സ്വന്തമാക്കിയ നടനായിരുന്നു പ്രഭാസ്. താരത്തിന്റെ അടുത്ത ചിത്രം കെജിഎഫ് സംവിധായകൻ പ്രശാന്ത് നീലിനൊപ്പമുളള സലാർ ആണ്. തനിക്ക് കൈമോശം വന്ന വിജയപാത തിരികെ നേടിക്കൊടുക്കുമെന്ന് പ്രതീക്ഷിക്കപ്പെടുന്ന ചിത്രം കൂടിയാണ് സലാർ. ആരാധകർ എത്രത്തോളം പ്രതീക്ഷ വെക്കുന്നു എന്നതിന്റെ തെളിവാണ് ചിത്രത്തിന്റെ ടീസറിന് ലഭിച്ച ജനപ്രീതി.
ഇപ്പോഴിതാ ചിത്രത്തിൽ അഭിനയിച്ച ഒരു നടന്റെ ആത്മവിശ്വാസം നിറഞ്ഞ വാക്കുകളാണ് സോഷ്യൽ മീഡിയ ഏറ്റെടുത്തിരിക്കുകയാണ്. തെലുങ്ക് നടനും നിർമ്മാതാവുമായ സപ്തഗിരിയുടെ ട്വീറ്റ് ആണ് ആരാധകരെ ആവേശത്തിലാഴ്ത്തിയിരിക്കുന്നത്. കൂടുതലും കോമഡി വേഷങ്ങൾ കൈകാര്യം ചെയ്തിട്ടുള്ള സപ്തഗിരി സലാറിലും ഒരു കഥാപാത്രത്തെ അവതരിപ്പിച്ചിട്ടുണ്ട്. ചിത്രത്തിന്റെ ഡബ്ബിംഗ് പൂർത്തിയാക്കിയ ശേഷമായിരുന്നു നടന്റെ പ്രതികരണം.
സലാർ… സലാറിലെ എന്റെ കഥാപാത്രത്തിന്റെ ഡബ്ബിംഗ് പൂർത്തിയാക്കി. ഒരു ഇരട്ട ബ്ലോക്ക്ബസ്റ്റർ ആയിരിക്കും ചിത്രം. ബോക്സ് ഓഫീസിൽ ചിത്രം 2000 കോടി മറികടക്കുമെന്ന് എനിക്ക് ആത്മവിശ്വാസമുണ്ട്. പാൻ വേൾഡ് റിബൽ സ്റ്റാർ പ്രഭാസിനും സംവിധായകൻ പ്രശാന്ത് നീലിനും നന്ദി. എന്നായിരുന്നു താരത്തിന്റെ ട്വീറ്റ്. ചിത്രത്തിനായി മലയാളികളും ഒരു പോലെ കാത്തിരിക്കുകയാണ്.
