കൊച്ചി: ഏഷ്യയിലെ തന്നെ ഏറ്റവും പഴക്കം ചെന്ന ഫുട്ബോൾ ടൂർണമെന്റായ ഡ്യൂറന്റ് കപ്പ് ട്രോഫി ടൂറിന്റെ കേരളത്തിലെ പ്രദർശനങ്ങൾക്ക് കൊച്ചി ദക്ഷിണ നാവികസേന ആസ്ഥാനത്ത് തുടക്കമായി. ടൂറിന്റെ ഫ്ലാഗ് ഓഫ് ദേശീയ താരം ഐ എം വിജയനും റിയൽ അഡ്മിറൽ സുശീൽ മേനോനും ചേർന്ന് നിർവഹിച്ചു. ഐഎൻഎസ് വിക്രാന്തിൽ നടന്ന ചടങ്ങിൽ ഇന്ത്യൻ ഫുട്ബോൾ താരം ഐ.എം. വിജയൻ മുഖ്യ അതിഥിയായി .റിയർ അഡ്മിറൽ സുശീൽ മേനോൻ , കേരള ബ്ലാസ്റ്റേഴ്സ് താരം കെ. പി രാഹുൽ തുടങ്ങിയവർ ഡ്യൂറന്റ് കപ്പ് ട്രോഫി ടൂറിന്റെ ഭാഗമായി.
ലോകത്തെ പഴക്കം ചെന്ന മൂന്നാമത്തെയും ,ഏഷ്യയിലെ പഴക്കം ചെന്നതുമായ ഫുട്ബോൾ ടൂർണമെന്റിന്റെ ട്രോഫി ഇത് ആദ്യമായാണ് കേരളത്തിൽ പ്രദർശിപ്പിക്കുന്നത് .
24 ടീമുകളാണ് ഇത്തവണ ടൂർണമെന്റിൽ പങ്കെടുക്കുന്നത്. 27 വർഷങ്ങൾക്ക് ശേഷം വിദേശത്തുനിന്നുള്ള ടീമുകൾ കൂടി ഇത്തവണ ടൂർണമെന്റിൽ പങ്കെടുക്കുന്നു എന്ന പ്രത്യേകതയും ഈവർഷത്തെ ടൂർണമെന്റിനുണ്ട്. ബംഗ്ലാദേശ്, നേപ്പാൾ എന്നീ രാജ്യങ്ങളിലെ ടീമുകളാണ് പങ്കെടുക്കുന്നത്. ടൂർണ്ണമെന്റിന്റെ പ്രചരണാർത്ഥം ഇന്ത്യയിലെ 15 പ്രധാന നഗരങ്ങളിൽ ട്രോഫി പ്രദർശിപ്പിക്കും.
ഓഗസ്റ്റ് ഒന്നിന് കൊൽക്കത്തയിൽ വച്ചാണ് ടൂർണമെന്റിന് തുടക്കം. കേരളത്തിൽ നിന്നും കേരള ബ്ലാസ്റ്റേഴ്സ് എഫ്.സി, ഗോകുലം കേരള എന്നീ ടീമുകളും ടൂർണമെന്റിൽ പങ്കെടുക്കും.
