ഫ്‌ലോറിഡ: വാഹനാപകടത്തിൽ നിന്ന് തലനാരിഴയ്ക്ക് രക്ഷപ്പെട്ട് ലയണൽ മെസി. അമേരിക്കയിലെ ഫ്‌ലോറിഡയിലായിരുന്നു സംഭവം. ഇതിന്റെ വീഡിയോ ഇപ്പോൾ സമൂഹമാദ്ധ്യമങ്ങളിൽ വൈറലായിരിക്കുകയാണ്. ട്രാഫിക് ലൈറ്റിൽ റെഡ് സിഗ്നൽ കത്തിയിട്ടും മെസി സഞ്ചരിച്ചിരുന്ന കാർ മുന്നോട്ട് നീങ്ങുകയായിരുന്നു. ഈ സമയം മറ്റ് വശങ്ങളിൽ നിന്ന് വാഹനങ്ങൾ അതി വേഗത്തിൽ എത്തിയത് അപകടസാഹചര്യത്തിലേക്ക് നയിക്കുകയായിരുന്നു. എന്നാൽ മറ്റ് വാഹനങ്ങൾ നിർത്തിയതിനാൽ വൻ ദുരന്തം ഒഴിവായി.
റോഡിലൂടെ വരുമ്പോൾ ഒരു ആരാധകൻ മെസിയുടെ കാറിനടുത്തേയ്‌ക്ക് ഓടിയെത്തിയതായി റിപ്പോർട്ടുകൾ പുറത്ത് വരുന്നുണ്ട്. ഇതേ തുടർന്നാണ് താരം സിഗഗ്നൽ ശ്രദ്ധിക്കാതെ കാർ മുന്നോട്ട് എടുത്തത് എന്നാണ് വിശദീകരണം. മെസിയുടെ വാഹനത്തിന് പിന്നാലെ എസ്‌കോർട്ട് വാഹനവും സഞ്ചരിക്കുന്നത് വീഡിയോയിൽ കാണാം. എന്നാൽ മെസിയുടെ വാഹനത്തിനൊപ്പം സൈറൻ മുഴക്കി പോലീസ് വാഹനം ഉണ്ടായിരുന്നതിനാൽ റെഡ് സിഗ്നൽ റോഡിൽ ഉണ്ടായിരുന്നെങ്കിലും കാർ മുന്നോട്ട് എടുക്കുന്നതിനുള്ള അനുമതി ഉണ്ടെന്നാണ് ചില മാദ്ധ്യമങ്ങൾ റിപ്പോർട്ട് ചെയ്തത്.
അമേരിക്കൻ ഫുട്‌ബോൾ ക്ലബ്ബായ ഇന്റർ മയാമിയോടൊപ്പം ചേരുന്നതിനാണ് മെസി അമേരിക്കയിൽ എത്തിയത്. കഴിഞ്ഞ ഞായറാഴ്ചയാണ് മെസിയെ മയാമി ജഴ്‌സിയിൽ അവതരിപ്പിച്ചത്. ജൂലൈ 21-ന് ക്രൂസ് അസൂലിനെതിരെയാണ് മയാമിയ്‌ക്കായി മെസിയുടെ ആദ്യ മത്സരം.
