ന്യൂഡൽഹി : കമ്യൂണിസ്റ്റ് ഭീകരനേതാവ് ദിനേശ് ഗോപെയുടെ സ്വത്തുക്കൾ കണ്ടുകെട്ടാൻ നീക്കം . പീപ്പിൾസ് ലിബറേഷൻ ഫ്രണ്ട് ഓഫ് ഇന്ത്യ തലവനായിരുന്ന ദിനേശ് ഗോപെ നിലവിൽ ജയിലിലാണ്. എൻഫോഴ്സ്മെന്റ് ഡയറക്ടറേറ്റാണ് ദിനേശ് ഗോപെയുടെ കോടിക്കണക്കിന് സ്വത്തുക്കളെക്കുറിച്ച് അന്വേഷിക്കുന്നത് . ഇയാളുടെ ഭാര്യമാരായ ഹീരാ ദേവിയും, ശകുന്തള കുമാരിയും ജയിലിലാണ്, അവരെയും ചോദ്യം ചെയ്യും. രണ്ട് ഭാര്യമാർ വഴിയും പലയിടത്തും ഇയാൾ തുക നിക്ഷേപിച്ചിട്ടുണ്ട്. ഹീരാ ദേവിയെയും ശകുന്തള കുമാരിയെയും ചോദ്യം ചെയ്യാനുള്ള അനുമതിയും അന്വേഷണ ഏജൻസിക്ക് ലഭിച്ചിട്ടുണ്ട്.
ദിനേശ് ഗോപി പലപ്പോഴും ലെവി പണം പിരിച്ചെടുക്കാറുണ്ടായിരുന്നുവെങ്കിലും അത് എവിടെയാണ് നിക്ഷേപിച്ചതെന്നതിനെക്കുറിച്ച് കൂടുതൽ ഒന്നും അറിയില്ല. ഈ മാസം ആദ്യം നടത്തിയ ചോദ്യം ചെയ്യലിൽ, കൊള്ളയടിച്ച പണം നിക്ഷേപിച്ചതിന്റെ ചില കണക്കുകൾ ഇയാൾ നൽകിയിട്ടുണ്ടെങ്കിലും അത് പര്യാപ്തമല്ല. കോടിക്കണക്കിന് രൂപയുടെ അനധികൃത നിക്ഷേപമാണ് ഇയാൾക്കുള്ളത്. റാഞ്ചി ആസ്ഥാനമായുള്ള പിഎംഎൽഎ കോടതിയാണ് ഇതുമായി ബന്ധപ്പെട്ട് ഇയാളുടെ രണ്ട് ഭാര്യമാരെയും ചോദ്യം ചെയ്ത് വിവരങ്ങൾ അറിയാൻ അനുമതി നൽകിയത്.
2022 ജനുവരി 30 ന് കൊൽക്കത്തയിൽ നിന്നാണ് രണ്ട് ഭാര്യമാർക്കൊപ്പം എൻഐഎയുടെ സ്പെഷ്യൽ സ്ക്വാഡ് ദിനേശ് ഗോപ്പിനെ അറസ്റ്റ് ചെയ്തത് . ഇയാളിൽ നിന്ന് ലക്ഷക്കണക്കിന് രൂപയും കണ്ടെടുത്തു. രണ്ട് ഭാര്യമാരും ബിർസ മുണ്ട സെൻട്രൽ ജയിലിലാണ്. ബിഹാർ, ജാർഖണ്ഡ്, ഒഡീഷ എന്നിവിടങ്ങളിലായി 102 കേസുകളാണ് ഇയാൾക്കെതിരെ രജിസ്റ്റർ ചെയ്തിരിക്കുന്നത്. 2 പതിറ്റാണ്ടോളം ഭീകരത പടർത്തി കോടിക്കണക്കിന് രൂപ തട്ടിയെടുത്തു.
ഇതുവരെ 2 ഡസൻ ബാങ്കുകളിൽ ഇയാളുടെ നിക്ഷേപം കണ്ടെത്തിയിട്ടുണ്ട്, അത് രണ്ട് ഭാര്യമാർ വഴി മാത്രമാണ് നടത്തിയത്. ഇയാളുടെ ഭാര്യമാരുടെ ബാങ്ക് അക്കൗണ്ടിൽ നിന്ന് 19.93 ലക്ഷം രൂപ പിടിച്ചെടുത്തു. 2 ഡസനിലധികം ബാങ്ക് അക്കൗണ്ടുകളിലൂടെ 2.50 കോടി രൂപയുടെ ഇടപാടുകൾ കണ്ടെത്തി. ഷെൽ കമ്പനികളും ബന്ധുക്കളുടെ പേരിലാണ് നടത്തിയിരുന്നത്.
