ഇന്ത്യയിൽ ഏറ്റവും ജനപ്രീതിയുള്ള ഒടിടി പ്ലാറ്റ്ഫോമുകളിൽ ഒന്നാണ് നെറ്റ്ഫ്ളിക്സ്. മിക്ക ആളുകളും സീരിസുകളും സിനിമകളും കാണുന്നതിനും ഈ പ്ലാറ്റ്ഫോമാണ് ഉപയോഗിക്കുന്നത്. ഇതിന് പുറമേ സൂഹൃത്തുക്കളിൽ നിന്നും പാസ്വേഡുകൾ വാങ്ങി ഉപയോഗിക്കുന്നവരും നിരവധിയാണ്. എന്നാൽ ഇത്തരത്തിൽ ഇനി മുതൽ പാസ്വേർഡ് കൈമാറാൻ സാധിക്കില്ല എന്നാണ് നെറ്റ്ഫ്ളിക്സ് പറയുന്നത്.
ഇന്ത്യയിൽ ഇനി മുതൽ പാസ്വേർഡ് പങ്കുവെക്കൽ ഓപ്ഷൻ ഉണ്ടാവില്ലെന്ന് കമ്പനി അറിയിച്ചു. ഇനി മുതൽ ഒരു കുടുംബത്തിലുള്ളവർക്ക് മാത്രമാണ് ഒരു അക്കൗണ്ട് ഉപയോഗിക്കാൻ സാധിക്കുക. കുടുംബാംഗങ്ങൾക്ക് പുറമേയുള്ള ആളുകൾക്ക് പാസ്വേർഡ് കൈമാറുന്ന ഉപഭോക്താക്കൾക്ക് ഇത് സംബന്ധിച്ചുള്ള പുതിയ നിർദ്ദേശം അറിയിച്ചുകൊണ്ടുള്ള ഇമെയിൽ കമ്പനി ഉടൻ തന്നെ അറിയിക്കുമെന്നും വ്യക്തമാക്കി. നെറ്റ്ഫ്ളിക്സ് പുതിയതായി ഇറക്കിയ പ്രസ്താവനയിൽ ഇക്കാര്യം സൂചിപ്പിച്ചിട്ടുമുണ്ട്.
ഒരു നെറ്റ്ഫ്ലിക്സ് അക്കൗണ്ട് ഒരു കുടുംബത്തിലുള്ളവർക്ക് ഉപയോഗിക്കാനുള്ളതാണെന്നും ഇവർക്ക് എവിടെ നിന്ന് വേണമെങ്കിലും ഇത് ഉപയോഗിക്കാമെന്നും പ്രസ്താവനയിൽ വ്യക്തമാക്കിയിട്ടുണ്ട്. എന്നാൽ കുടുംബത്തിന് പുറത്തുള്ള ആർക്കെങ്കിലും ഇത് ഷെയർ ചെയ്യുകയാണെങ്കിൽ അവർ അവരുടെ പ്രൊഫൈൽ പുതിയ അക്കൗണ്ടിലേക്ക് മാറ്റേണ്ടിവരും. ഇതിനായി പ്രത്യേകം പണം നൽകേണ്ടതായും വരുമെന്ന് പ്രസ്താവനയിൽ പറയുന്നു. കൂടാതെ പാസ്വേഡ് മാറ്റുന്നതും പരിഗണനയിൽ ഉണ്ടെന്ന് കമ്പനി അറിയിച്ചു.
ഇത് ഒഴിവാക്കുന്നതിനായി എല്ലാ ഉപഭോക്താക്കളും തങ്ങളുടെ അക്കൗണ്ടിൽ ലോഗ് ഇൻ ചെയ്തതിന് ശേഷം സെക്യൂരിറ്റി ആന്റ് പ്രൈവസി സെറ്റിംഗ്സ് എന്ന ഓപ്ഷനിൽ ക്ലിക്ക് ചെയ്ത് മാനേജ് ആക്സസ് ആൻഡ് ഡിവൈസ് ഓപ്ഷൻ സെലക്ട് ചെയ്യണം. പിന്നീട് ഉപഭോക്താക്കൾക്ക് അക്സസ് ഇല്ലാത്ത ഡിവൈസിൽ നിന്ന് എല്ലാം സൈൻ ഔട്ട് ചെയ്യണം. ഇതിന് ശേഷമാണ് പാസ്വേർഡ് റീസെറ്റ് ചെയ്യേണ്ടത്. ഇതോടൊപ്പം തന്നെ കുടുംബാംഗങ്ങളെയും ഉൾപ്പെടുത്താൻ സാധിക്കും.
