2023 ഏകദിന ലോകകപ്പിന്റെ ഔദ്യോഗിക ഫിലിം പുറത്തിറക്കി ഐസിസി. ‘ഇറ്റ് ടേക്കസ് വൺ ഡേ’ എന്ന പേരിൽ ഐസിസിയുടെ യൂട്യൂബ് ചാനലിലാണ് ഫിലിം റിലീസ് ചെയ്തത്. ബോളിവുഡ് താരം ഷാരൂഖ് ഖാനാണ് പ്രമോ അവതരിപ്പിച്ചിരിക്കുന്നത്. രണ്ട് മിനിറ്റ് 12 സെക്കൻഡ് ദൈർഘ്യമുള്ള വീഡിയോയിൽ ലോകകപ്പ് വിശേഷങ്ങളാണ് പങ്കുവെയ്ക്കുന്നത്.
ലോകകപ്പിന്റെ ഐതിഹാസിക നിമഷങ്ങളെ നവരസങ്ങളോട് ബന്ധിപ്പിക്കുകയാണ് പ്രമോ വീഡിയോ. ക്രിക്കറ്റ് മത്സരത്തിനിടെ ആരാധകർ സാധാരണയായി അനുഭവിക്കുന്ന ഒൻപത് വികാരങ്ങളോടാണ് നവരസങ്ങളെ ഉപമിച്ചിരിക്കുന്നതെന്ന് ഐസിസി പറഞ്ഞു. ദിനേശ് കാർത്തിക്, ജോണ്ടി റോഡ്സേ, മുത്തയ്യ മുരളീധരൻ, ശുഭാമാൻ ഗിൽ, ഓയിൻ മോർഗൻ തുടങ്ങിയ താരങ്ങൾക്കൊപ്പം വനിതാ ക്രിക്കറ്റ് താരം ജെമീമ റോഡ്രിഗസും പ്രത്യക്ഷപ്പെടുന്നു.
ഇത്തവണ ഇന്ത്യയാണ് ഏകദിന ലോകകപ്പിന് വേദിയാകുന്നത്. ഒക്ടോബർ-നവംബർ മാസങ്ങളിലാകും മത്സരം. പത്ത് വേദികളിലായി പത്ത് ടീമുകളാകും അങ്കത്തിനിറങ്ങുക. അഹമ്മദാബാദിലെ നരേന്ദ്ര മോദി സ്റ്റേഡിയത്തിന് പുറമെ ബെംഗളൂരുവിലെ എം ചിന്നസ്വാമി സ്റ്റേഡിയം, ചെന്നൈയിലെ എം എ ചിദംബരം സ്റ്റേഡിയം, ദില്ലിയിലെ അരുൺ ജെയ്റ്റ്ലി സ്റ്റേഡിയം, ധരംശാലയിലെ ഹിമാചൽപ്രദേശ് ക്രിക്കറ്റ് അസോസിയേഷൻ സ്റ്റേഡിയം, ഹൈദരാബാദിലെ രാജീവ് ഗാന്ധി സ്റ്റേഡിയം, കൊൽക്കത്തയിലെ ഈഡൻ ഗാർഡൻസ്, ലഖ്നൗവിലെ ഏകനാ സ്റ്റേഡിയം, മുംബൈയിലെ വാംഖഡെ സ്റ്റേഡിയം, പുനെയിലെ മഹാരാഷ്ട്ര ക്രിക്കറ്റ് അസോസിയേഷൻ സ്റ്റേഡിയം എന്നിവിടങ്ങളിലായാണ് ലോകകപ്പ് മത്സരങ്ങൾ നടക്കുക. ലോകകപ്പിന് മുന്നോടിയായി എല്ലാ സ്റ്റേഡിയങ്ങളിലും അറ്റകുറ്റപണികൾ പുരോഗമിക്കുകയാണ്. തിരുവനന്തപുരം ഗ്രീൻഫീൽഡ് സ്റ്റേഡിയം സന്നാഹമത്സരങ്ങൾക്ക് വേദിയാവും. ഹോട്ട്സ്റ്റാറിനാണ് ടൂർണമെന്റിന്റെ സംപ്രേക്ഷണാവകാശം.
