ന്യൂഡൽഹി: വരും തലമുറയെ ഫുട്‌ബോളിലേക്ക് ഉയർത്തി കൊണ്ടുവരിക എന്ന ലക്ഷ്യത്തിലേക്ക് പുതിയ ചുവടുവയ്പ്പുമായി അഖിലേന്ത്യ ഫുട്‌ബോൾ ഫെഡറേഷൻ. അണ്ടർ 20 ഫുട്‌ബോൾ ചാമ്പ്യൻഷിപ്പ് എല്ലാവർഷവും സംഘടിപ്പിക്കാനുളള നിർദ്ദേശം എഐഎഫ്എഫ് മുന്നോട്ട് വച്ചു.
2024 ജനുവരി- ഫെബ്രുവരി മാസങ്ങളിൽ മത്സരം സംഘടിപ്പിക്കാനാണ് ഫെഡറേഷൻ ശ്രമിക്കുന്നത്. 2005-2007 വർഷങ്ങളിൽ ജനിച്ചവരായിരിക്കും പ്രഥമസീസണിലെ താരങ്ങൾ. മുമ്പ് എഐഎഫ്എഫ് ചാമ്പ്യൻഷിപ്പ് സ്ഥിരമായി സംഘടിപ്പിച്ചുകൊണ്ടിരുന്നെങ്കിലും പിന്നീട് നിലയ്‌ക്കുകയായിരുന്നു.
രാജ്യത്തെ 20 വയസ്സിന് താഴെയുളള ഫുട്‌ബോൾ താരങ്ങൾക്ക് കൂടുതൽ അവസരം നേടിക്കൊടുക്കുക എന്ന ലക്ഷ്യത്തോടെയാണ് പുതിയ ആശയം കൊണ്ടുവരുന്നതെന്ന് എഐഎഫ്എഫ് അദ്ധ്യക്ഷൻ കല്യാൺ ചൗബേ പറഞ്ഞു. ടൂർണമെന്റിൽ മികവ് കാട്ടുന്ന താരങ്ങൾക്ക് സന്തോഷ് ട്രോഫിയിലേക്കും ദേശീയ ടീമിലേക്കും സെലക്ഷൻ ലഭിക്കുമെന്നതിന്റെ അടിസ്ഥാനത്തിലാണ് പുതിയ പദ്ധതി.
