ലക്നൗ : പബ്ജി പ്രണയകഥയിലെ നായിക സീമ ഹൈദറിനെ തടങ്കൽ കേന്ദ്രത്തിലേയ്ക്ക് മാറ്റാൻ സാധ്യത . വ്യാജ ആധാർ കാർഡ് ഉണ്ടാക്കി നൽകിയ ജനസേവനകേന്ദ്രത്തിലെ ജീവനക്കാർ പിടിയിലായതിനു പിന്നാലെ സീമയുടെ കാമുകൻ സച്ചിനെ യുപി എടിഎസ് ചോദ്യം ചെയ്യാൻ കൊണ്ടുപോയി . ഞായറാഴ്ചയും നോയിഡ പോലീസ് സച്ചിനെ ബുലന്ദ്ഷഹറിലേക്ക് കൊണ്ടുപോയിരുന്നു . അവിടെ നിന്നാണ് ആധാർ കാർഡിൽ കൃത്രിമം കാണിച്ച ജനസേവാ കേന്ദ്രത്തിലെ ജീവനക്കാരെ പിടികൂടിയത് .
സീമയെ പാകിസ്താനിലേയ്ക്ക് അയക്കാനുള്ള ഒരുക്കത്തിലാണ് പോലീസ്. ഇതിനു മുന്നോടിയായി സീമയെ ഉടൻ തടങ്കൽ കേന്ദ്രത്തിലേക്ക് അയച്ചേക്കും. സീമയുടെ ഐഡിയും അവരുടെയും കുട്ടികളുടെയും പാസ്പോർട്ടുകളും പാക് എംബസിയിലേക്ക് അയച്ചിട്ടുണ്ട്. എംബസി ഈ രേഖകൾ പാകിസ്ഥാൻ സർക്കാരിന് അയച്ച് അതിർത്തിയിൽ റിപ്പോർട്ട് നൽകും.
സീമ ആ രാജ്യത്തെ പൗരയാണെന്ന് പാക് സർക്കാർ വിശ്വസിച്ചാൽ മാത്രമേ സീമയെ എംബസിക്ക് കൈമാറൂ. അല്ലാത്തപക്ഷം തെളിവുകളുടെ അടിസ്ഥാനത്തിൽ തടങ്കൽ കേന്ദ്രത്തിൽ പാർപ്പിക്കും.ഇതിനുപുറമെ, സീമയുടെ ആധാർ കാർഡിൽ കൃത്രിമം നടത്തിയതുമായി ബന്ധപ്പെട്ട് യുപി എടിഎസിന് വ്യക്തമായ വിവരം ലഭിച്ചിട്ടുണ്ട്. ബുലന്ദ്ഷഹറിലെ പൊതു സേവന കേന്ദ്രം നടത്തുന്ന രണ്ട് സഹോദരന്മാരാണ് ഈ കൃത്രിമം നടത്തിയത്.
ജനസേവാ കേന്ദ്രത്തിൽ നിന്ന് സീമയുടെ അക്കൗണ്ടിലേക്ക് കുറച്ച് പണവും ട്രാൻസ്ഫർ ചെയ്തതായി പോലീസ് വൃത്തങ്ങൾ അറിയിച്ചു.എഫ്ഐആറിൽ സച്ചിൻ-സീമയ്ക്കെതിരെ വ്യാജരേഖ ചമയ്ക്കൽ കേസ് പോലീസ് ഉന്നയിച്ചേക്കും. ഇതിൽ സീമയ്ക്കും സച്ചിനും 7 വർഷം വരെ ശിക്ഷ ലഭിക്കുമെന്നും പോലീസ് പറഞ്ഞു .
