ന്യൂഡൽഹി: യുഎസും ഇറാനും തമ്മിലുള്ള സംഘർഷം വീണ്ടും ശക്തമായ പശ്ചാത്തലത്തിൽ ഇറാനിലേക്കുള്ള യാത്രകൾ മാറ്റിവയ്ക്കണമെന്ന് ഇന്ത്യൻ പൗരന്മാർക്ക് കേന്ദ്രസർക്കാർ നിർദേശം നൽകി. സുരക്ഷാ സാഹചര്യം മെച്ചപ്പെടുന്നതുവരെ ഇറാനിലേക്ക് യാത്ര ചെയ്യരുതെന്നും, നിലവിൽ അവിടെയുള്ളവർ ലഭ്യമായ വിമാനസർവീസുകൾ ഉപയോഗിച്ച് രാജ്യം വിടുന്നത് പരിഗണിക്കണമെന്നും ടെഹ്റാനിലെ ഇന്ത്യൻ എംബസി വ്യക്തമാക്കി.
ഇറാനിലുള്ള എല്ലാ ഇന്ത്യൻ പൗരന്മാരും പരമാവധി ജാഗ്രത പാലിക്കണമെന്നും, എംബസിയിൽ ഇതുവരെ രജിസ്റ്റർ ചെയ്യാത്തവർ ഉടൻ രജിസ്റ്റർ ചെയ്യണമെന്നും നിർദേശമുണ്ട്. ഔദ്യോഗിക വെബ്സൈറ്റും സാമൂഹിക മാധ്യമ അക്കൗണ്ടുകളും നിരന്തരം പരിശോധിക്കണമെന്നും എംബസി ആവശ്യപ്പെട്ടു. സംഘർഷം രൂക്ഷമായ തെക്കൻ തീരപ്രദേശങ്ങൾ ഉൾപ്പെടെയുള്ള മേഖലകൾ ഒഴിവാക്കണമെന്നും, പ്രാദേശിക ഭരണകൂടങ്ങളുടെ നിർദേശങ്ങൾ കർശനമായി പാലിക്കണമെന്നും എംബസി മുന്നറിയിപ്പ് നൽകി.
