തിരുവനന്തപുരം: കാർ കുന്നിന് മുകളിൽ നിന്ന് താഴേയ്ക്ക് വീണ് അപകടം. വർക്കലയിലാണ് സംഭവം. തമിഴ്നാട്ടിൽ നിന്നുള്ള വിനോദ സഞ്ചാരികൾ യാത്ര ചെയ്ത കാറാണ് അപകടത്തിൽപ്പെട്ടത്. കാറിൽ ഉണ്ടായിരുന്ന അഞ്ച് പേർക്കും ഗുരുതരമായി പരിക്കേറ്റു. വർക്കല ആലിയിറക്കം ഭാഗത്തായിരുന്നു അപകടം ഉണ്ടായത്. നിയന്ത്രണംവിട്ട കാർ ഉരുണ്ട് 50 അടി താഴ്ചയിലേയ്ക്ക് പതിക്കുകയായിരുന്നു. കഴിഞ്ഞ ദിവസം രാത്രിയായിരുന്നു സംഭവം.
ചെന്നൈ സ്വദേശികളായ മധുമിത(21), കുനാൽ(20), ഹാജകമാൽ(20) എന്നിവരെ ആദ്യം വർക്കലയിലെ സ്വകാര്യ ആശുപത്രിയിലും പിന്നീട് തിരുവനന്തപുരം മെഡിക്കൽ കോളേജ് ആശുപത്രിയിലും പ്രവേശിപ്പിക്കുകയായിരുന്നു. ചെന്നൈ ആർ വി കോളേജിലെ എഞ്ചിനീറിംഗ് വിദ്യാർത്ഥികളായിരുന്നു സംഘത്തിലെ അഞ്ച് പേരും.
കുന്നിന് മുകളിൽ നിർത്തിയിട്ടിരുന്ന കാർ ഉരുണ്ടിറങ്ങുന്നതിനിടയിൽ പാറകളിൽ തട്ടിമറിഞ്ഞ് കടൽതീരത്ത് പതിക്കുകയായിരുന്നു. ഈ മാസം ആദ്യം വർക്കലയിൽ ഓട്ടോറിക്ഷ കടലിൽ വീണും അപകടം നടന്നിരുന്നു. 50 അടി താഴ്ചയിൽ പാറക്കെട്ടിലേക്കാണ് ഓട്ടോറിക്ഷ വീണത്. കഴിഞ്ഞ മാസം വർക്കല ക്ലിഫിലെത്തിയ വിനോദസഞ്ചാരിയും കാൽവഴുതി താഴേക്ക് വീണിരുന്നു.
