മനുഷ്യന്റെ കണ്ണുകളെ വിസ്മയത്തിന്റെ മായാജാലം കാണിക്കാനൊരുങ്ങി നാസ. പ്രപഞ്ചത്തിന്റെ അത്ഭുത കാഴ്ചകൾ ഇനി മുതൽ നാസയുടെ സ്വന്തം സ്ട്രീമിംഗ് പ്ലാറ്റ്ഫോമിലൂടെ ലഭ്യമാകും. നാസ പ്ലസ് എന്ന് പേരിട്ടിരിക്കുന്ന ചാനലിന്റെ ബീറ്റ വേർഷൻ ആകും ആദ്യ ഘട്ടത്തിൽ പുറത്തിറക്കുന്നത്. നാസയുടെ എല്ലാ വിക്ഷേപണങ്ങളുടെയും തത്സമയ സംപ്രേഷണം ഉൾപ്പെടെ ഇനി മുതൽ ഇതിലൂടെ ലഭ്യമാകും. നാസയുടെ ബഹിരാകാശ പര്യവേക്ഷണത്തിന്റെ ഒരു നേർ കാഴ്ചയായിരിക്കും ചാനൽ.
മറ്റ് ചാനലുകളിൽ നിന്ന് വ്യത്യസ്തമായ ഉള്ളടക്കവുമായാണ് നാസ എത്തുന്നത്. കൂടാതെ ഇതൊരു പരസ്യ രഹിത പ്ലാറ്റ്ഫോം കൂടിയായിരിക്കുമെന്ന് നാസയുടെ വാഷിംഗ്ടണിലെ ആസ്ഥാനത്തെ ചീഫ് ഇൻഫർമേഷൻ ഓഫീസർ ജെഫ് സീറ്റൺ വ്യക്തമാക്കി. ആൻഡ്രോയിഡ് ഐഒഎസ് ഫോണുകളിൽ നാസ പ്ലസ് ലഭ്യമാകും. നിലവിൽ ചാനലിന്റെ പ്രവർത്തനങ്ങൾ പരീക്ഷണ അടിസ്ഥാനത്തിലാണ് ആരംഭിച്ചിരിക്കുന്നത്. ഉടൻ തന്നെ പ്രധാന പ്ലാറ്റ് ഫോമുകളിൽ എല്ലാം തന്നെ നാസ പ്ലസ് ലഭ്യമാകുമെന്ന് അധികൃതർ വ്യക്തമാക്കി. ഇതിന് പുറമെ ആപ്പിൾ ടിവി, ഫയർ ടിവി തുടങ്ങിയ സ്ട്രീമിംഗ് സേവനങ്ങളിലൂടെയും നാസ പ്ലസ് ആക്സസ് ലഭിക്കും. വിജ്ഞാന പ്രദമായ ടിവി ഷോകളായിരിക്കും നാസ പ്ലസ് അവതരിപ്പിക്കുന്നത്.
ഡെസ്ക്ടോപ്പ് കമ്പ്യൂട്ടറിലെ ഉപയോക്താക്കൾക്ക് വെബ് ബ്രൗസറുകളിലൂടെ നാസ പ്ലസ് ആക്സസ് ചെയ്യാനാകും. നാസയുടെ പ്രധാന ദൗത്യങ്ങൾ, ഗവേഷണ പദ്ധതികൾ, ആർട്ടെമിസ് പ്രോഗ്രാമിലെ അപ്ഡേറ്റുകൾ എന്നിവയെക്കുറിച്ചുള്ള വിവരങ്ങൾ ഇനി നാസ പ്ലസ് ചാനലിലൂടെ ലഭ്യമാകും. പുതിയ വെബ്, ആപ്പ് അനുഭവങ്ങളിലൂടെ ഡിജിറ്റൽ രംഗത്തെ സാന്നിധ്യം ശക്തമാക്കാനാണ് നാസ തയാറെടുത്തിരിക്കുന്നത്. സൗജന്യമായാണ് നാസ പ്ലസ് കാണികൾക്ക് മുന്നിലെത്തുന്നത്. യുവ പഠിതാക്കൾക്കായി രൂപകൽപ്പന ചെയ്തിട്ടുള്ള വിദ്യാഭ്യാസ പരിപാടികൾ മുതൽ ആകർഷകമായ ഡോക്യുമെന്റ്റികൾ വരെ ഇതിലുണ്ടാകും. കൂടാതെ നാസ പ്ലസിൽ വിവിധ വെബ്സൈറ്റുകളിൽ നിന്നുമുള്ള ഉള്ളടക്കങ്ങൾ ഏകീകരിക്കുകയും എളുപ്പത്തിൽ ആക്സസ് ലഭ്യമാക്കുന്നതിനുമായി നാവിഗേഷനും സെർച്ച് ഓപ്ഷനുകളും ഉൾപ്പെടുത്തും.
