കണ്ണൂര്‍: പ്രധാനമന്ത്രി നരേന്ദ്രമോദിക്കും കേന്ദ്ര ആഭ്യന്തര മന്ത്രി അമിത് ഷായ്ക്കും കൈത്തറി കൊണ്ടുള്ള ഓണക്കോടിയുമായി കേരള സര്‍ക്കാര്‍. സംസ്ഥാന സർക്കാർ ഔദ്യോഗികമായി സമ്മാനിക്കുന്ന ഓണക്കോടിക്കായി തുണി നെയ്തെടുക്കുന്നത് കണ്ണൂരിൽ നിന്നും. കണ്ണൂര്‍ ചൊവ്വയിലെ ലോക്‌നാഥ് കോ-ഓപ്പ് വീവിങ് സൊസൈറ്റിയാണ് ഓണക്കോടിക്കായുള്ള തുണി ഒരുക്കുന്നത്. വാരത്തെ കെ. ബിന്ദു നെയ്യുന്ന തുണിയുടെ പ്രവൃത്തി പൂര്‍ത്തിയായി. ഒരാഴ്ച കൊണ്ടാണ് തുണി നെയ്തെടുത്തത്. ഈ തുണി കൊണ്ട് തയ്യിപ്പിച്ച കുർത്തയാണ് ഇരുവർക്കും സമ്മാനിക്കുന്നത്.
കോട്ടയം രാമപുരം സ്വദേശിയും പാലക്കാട് കൊടുമ്പ് കൈത്തറി ക്ലസ്റ്ററിലെ ഡിസൈനറുമായ അഞ്ജു ജോസാണ് കുര്‍ത്തയുടെ നിറങ്ങളും പാറ്റേണും രൂപകല്പന ചെയ്തത്. വെള്ള, റോസ്, ഇളംപച്ച, ചന്ദനനിറം എന്നിവയോടൊപ്പം ഇളംതളിരിലയുടെ നിറംകൂടി ഒത്തുചേര്‍ന്ന് കുത്തനെ വരയോടു കൂടിയതാവും കുര്‍ത്ത. അതീവ കൃത്യതയൊടെയുള്ള നെയ്‌ത്തില്‍ ദിവസം മൂന്നു മീറ്റര്‍ തുണിയേ ഒരുക്കാന്‍ സാധിക്കൂ.
ദേശീയ കൈത്തറി ദിനമായ നാളെ തുണി തിരുവനന്തപുരത്തെത്തിക്കും. കുര്‍ത്ത തയ്‌ച്ചെടുക്കുക ഹാന്‍ടെക്‌സിന്റെ തിരുവനന്തപുരത്തെ തുന്നല്‍ കേന്ദ്രത്തിലാണ്. ഹാൻടെക്സ് സ്റ്റേറ്റ് ഡയറക്ടര്‍ കെ.എസ്. അനില്‍കുമാറിന്റെ നിര്‍ദേശ പ്രകാരം ലോക്‌നാഥ് വിവേര്‍സ് സെക്രട്ടറി പി.വിനോദ് കുമാര്‍ തുണി നിര്‍മിക്കുന്ന ദൗത്യം ഏറ്റെടുത്ത് പൂർത്തിയാക്കുകയായിരുന്നു.
