താൻ സിനിമയിൽ എത്തുന്നതിന് പിന്നിൽ നടൻ ടിജി രവിയാണെന്ന് ഉണ്ണി മുകുന്ദൻ പറഞ്ഞിരുന്നു. മാളികപ്പുറം സിനിമയുടെ ഗംഭീര വിജയത്തിന് ശേഷം നൽകിയ അഭിമുഖത്തിലായിരുന്നു ഉണ്ണിമുകുന്ദൻ ഇക്കാര്യം പരാമർശിച്ചത്. ലോഹിതദാസിനെ പരിചയപ്പെട്ടതാണ് തന്റെ സിനിമ ജീവിതത്തിന് കാരണമെന്നും അതിന് വഴിത്തിരിവായത് ടിജി രവിയാണെന്നുമാണ് ഉണ്ണിമുകുന്ദൻ പറഞ്ഞത്. ഇപ്പോഴിതാ ഇത് സംബന്ധിച്ച ടിജി രവിയുടെ പ്രതികരണമാണ് സമൂഹമാദ്ധ്യമങ്ങളിൽ ശ്രദ്ധേയമാകുന്നത്. ഇത് വലിയ സംഭവമേ അല്ലെന്നായിരുന്നു ടിജി രവിയുടെ പ്രതികരണം.
അദ്ദേഹത്തിന്റെ വാക്കുകൾ…
ഒരു ചെറിയ ഉന്ത്, അത്രയേ ഉള്ളു. അതിലിപ്പോൾ വലിയ കാര്യമില്ല. കാരണം ഉണ്ണി മുകുന്ദന് സംവിധായകൻ ലോഹിതദാസിന് ഒന്ന് കണക്ട് ചെയ്ത് കൊടുക്കാൻ വേണ്ടി ഒരു റിക്വസ്റ്റ് വന്നു. ഉണ്ണി മുകുന്ദനെ പരിചയമുള്ള എന്റെ ഒരു സുഹൃത്ത് ഉണ്ട് അദ്ദേഹം വഴിയായിരുന്നു ഇത്. അദ്ദേഹത്തിനെ കോൺടാക്ട് ചെയ്യാനുള്ള ഒരു വഴി ഞാൻ ഉണ്ടാക്കി കൊടുത്തു. അങ്ങനെയൊരു കാര്യം മാത്രമേ ഞാൻ ചെയ്തിട്ടുള്ളു. ബാക്കിയൊക്കെ ഉണ്ണി മുകുന്ദന്റെ മിടുക്ക് കൊണ്ട് കയറി വന്നതാണ്. അല്ലാതെ ആ തള്ള് കൊണ്ടൊന്നും ആരും കയറി വരില്ല. പറയുമ്പോൾ ഞാൻ ഒരു തള്ള് തന്നല്ലോ എന്ന് അദ്ദേഹം നന്ദിപൂർവ്വം സ്മരിക്കുന്നതിൽ ഒരു സന്തോഷമുണ്ട്.
ആർക്ക് വേണ്ടിയും എന്തെങ്കിലും വേഷം വേണമെന്ന് പറഞ്ഞ് സമീപിക്കാറില്ലെന്നും സ്വന്തം മകന് പോലും വേഷം വാങ്ങി നൽകിയിട്ടില്ലെന്നും ടിജി രവി പറയുന്നു. അടുത്തിടെ പുറത്തിറങ്ങിയ ഭഗവാൻ ദാസന്റെ സാമ്രാജ്യം എന്ന ചിത്രത്തിലൂടെ ടൈറ്റിൽ റോളിൽ ടിജി രവി എത്തിയിരുന്നു. വളരെ വലിയ പ്രേക്ഷക സ്വീകാര്യതയായിരുന്നു ചിത്രത്തിന് ലഭിച്ചത്. ചിത്രം തീയറ്ററുകളിൽ വിജയകരമായി പ്രദർശനം തുടരുകയാണ്.
